John Galsworthy

John Galsworthy
Gebore(1867-08-14)14 Augustus 1867
Kingston upon Thames, Engeland
Sterf31 Januarie 1933 (op 65)
Hampstead, Londen, Engeland
NasionaliteitVlag van Verenigde Koninkryk Verenigde Koninkryk
BeroepSkrywer
Bekend virThe Forsyte Saga (1922)
Ouer(s)John en Blanche Bailey (née Bartleet) Galsworthy
Handtekening

John Galsworthy (1867–1933) het in die eerste dertig jaar van die 20ste eeu 'n groot aantal Engelse romans en toneelstukke geskryf. Hy is veral bekend vir sy romansiklus The Forsyte saga. Die Engelse skrywer John Galsworthy is op 14 Augustus 1867 in Kingston upon Thames, Engeland, gebore.

Hy het in die regte aan Oxford gestudeer, maar het nooit gepraktiseer nie. Omdat hy genoeg geld gehad het, het hy al sy tyd aan skryfwerk gewy. Die lys werke wat hy geproduseer het, is indrukwekkend: 17 romans, 26 toneelstukke. 12 verhaalbundels, asook opstelle en gedigte.

Sy eerste boek was die verhaalbundel The four winds (1897), waarvoor hy sy gegewens op 'n reis na die Verre Ooste versamel het. Nog drie romans en 'n verhaalbundel het hierna gevolg voordat hy in 1906 naam gemaak het met die toneelstuk The silver box en die roman The man of property, die eerste van The Forsyte saga. Galsworthy se romans het veral gegaan oor die lewe van mense van sy eie stand, die sogenaamde "upper middle class".

In sy toneelstukke het hy egter die sosiale probleme tussen arm en ryk, byvoorbeeld die tussen arbeiders en fabrieksdirekteure, uitgebeeld. Hierin het hy gepleit vir wedersydse begrip en menslikheid, maar nooit kant gekies tussen die partye nie. Van die romans wat Galsworthy voor die Eerste Wêreldoorlog geskryf het, is The island pharisees (1904), The country house (1907), Fraternity (1909) en The patrician (1911) die belangrikstes. Gedurende die oorlog het hy as vrywilliger in hospitale gewerk en eers daarna weer begin skryf.

Hy het voort gewerk aan die tema die familie Forsyte, waarvan die karakters reeds in 1906 in The man of property hul verskyning gemaak het. In Chancery het in 1920 en To let in 1921 verskyn en sou saam met The man of property en die kortverhale Indian summer of a Forsyte (1918) en Awakening (1920) as The Forsyte saga bekend staan. A modern comedy was die volgende Forsyte-triologie en bestaan uit The white monkey (1924), The silver spoon (1926) en Swan song (1928) en die kortverhale A silent wooing (1927) en Passers by (1927). In 1930 het nog 'n bundel kortverhale met karakters uit die Forsyte-romans verskyn, naamlik On Forsyte change. Na Galsworthy se dood op 31 Januarie 1933 in Grove Lodge, Hampstead is die trilogie End of the Chapter gepubliseer, waarin ’n aangetroude niggie van die Forsytes die hoofpersoon is.

Die eerste Forsyte-trilogie het die meeste literêre waarde. Hierin staan Galsworthy baie krities teenoor die hoofperoon wat uitsluitlik in terme van besit dink. In die loop van die jare het die skrywer egter al hoe meer bewondering getoon vir die hoofpersoon se strenge moraal en norme, hoe bekrompe en liefdeloos ook al. Daardeur het die toon van die volgende boeke sentimenteler geword en die werke is dan ook meer van historiese as van literêre belang. Galsworthy het in 1932 die Nobelprys vir Letterkunde ontvang.[1]

Verwysings

  1. ↑ "The Nobel Prize in Literature 1932" (in Engels). Nobelprize.org. Geargiveer vanaf die oorspronklike op 17 Mei 2020. Besoek op 4 September 2019.

Bronnelys

Eksterne skakels