Yuga

Yuga in Hindoeïsme is ’n epog in ’n siklus van vier tydperke. ’n Volledige yuga begin met die Satya Yuga, gevolg deur die Treta, Dvapara en Kali Yuga. Ons is tans in ’n Kali Yuga, wat in 3102 v.C. begin het met die einde van die Mahabharata-oorlog.

Vier yugas

Daar is vier yugas in ’n siklus:

  1. Satya Yuga
  2. Treta Yuga
  3. Dvapara Yuga
  4. Kali Yuga

Eienskappe van die yugas

  • Satya Yuga, ook bekend as die Krita (Goue) Yuga: die eerste en beste yuga. Dit was ’n tyd van waarheid en volmaaktheid. Die Krita Yuga word so genoem omdat daar net een godsdiens was, en alle mense was heilig: Daar is dus nie van hulle verwag om godsdiensseremonies uit te voer nie. Mense was reusagtig en sterk gebou, eerlik, jonk, lewenskragtig, geleerd en deugsaam. Daar was net een Veda. Alle mense kon ten volle geseënd geraak. Daar was geen landbou en mynbou nie, want die aarde het dié rykdomme self voortgebring. Die weer was aangenaam en almal was gelukkig. Daar was geen godsdienssektes nie. Daar was geen siektes, verval of vrees nie. Mense het 100 000 jaar oud geword en het soms honderde of duisende kinders gehad. Hulle moes duisende jare lank boete doen voordat hulle samadhi (’n toestand van volle bewustheid) verkry en gesterf het.
  • Treta Yuga: die tweede yuga, hoewel treta "derde" beteken. In hierdie tydperk het deugsaamheid effens afgeneem. Baie keisers het die wêreld verower en oorheers. Daar was dikwels oorloë en die weer het begin verander tot uiterstes. Oseane en woestyne het ontstaan. Mense het kleiner geword. Landbou, arbeid en mynbou het ontstaan. Mense het gemiddeld 1 000 tot 10 000 jaar oud geword.
  • Dvapara Yuga: die derde yuga. Dvapara beteken "ná twee". Mense het Tamas-eienskappe begin kry. (Tamas dui op wanbalans, chaos, angstigheid, onreinheid en geweld.)[1][2]) Mense was nie so sterk soos hul voorouers nie. Siektes het algemeen geraak. Mense het ontevrede en veglustig geraak. Die Vedas is in vier dele verdeel. Mense het steeds jeugdige eienskappe gehad wanneer hulle oud was en het ’n paar eeue oud geword.
  • Kali Yuga: die finale tydperk. Dit is die tyd van donkerte en onkunde. Mense het sondaars en deugdeloos geword. Hulle het slawe van hul passies geword, asook swak in vergelyking met hul voorouers. Mense het leuenaars en skynheilig geword. Kennis het verlore gegaan en minder geskrifte het ontstaan. Mense het verbode kosse begin eet. Die omgewing is besoedel en water en kos het skaars geword. Daar is minder rykdom. Gesinne het begin verdwyn. Mense word skaars 100 jaar oud, maar aan die einde van die yuga sal dit so kort as 20 jaar wees.

Duur van die yugas

Volgens die Wette van Manu, een van die oudste geskrifte waarin die yugas beskryf word, is die duur daarvan onderskeidelik 4 800, 3 600, 2 400 en 1 200, dus altesaam 12 000 jaar. Die verhouding tussen die tydperke is 4:3:2:1.

Volgens Bhagavatapurana 3.11.19,[3] wat van 200 v.C. tot 200 n.C. dateer, is die yugas baie langer omdat goddelike jare gebruik word, waarin een goddelike dag gelyk is aan een menslike jaar: Die duur van die Satya Yuga is dus 4 800 x 360, of 1 728 000 jaar, ens.[3]

Vishnuparana I:III voeg by:

  • 2 ayanas (sesmaandeperiodes) = 1 menslike jaar of 1 goddelike dag
  • 12 000 goddelike jare = 4 yugas = 4 320 000 menslike jare = 1 mahayuga

Volgens ’n teorie van die ghoeroe Sri Yukteswar in sy werk Die Heilige Wetenskap is daar benewens die dalende siklus ’n stygende siklus (in die teenoorgestelde volgorde). Dit bring die duur van die volle siklus op 24 000 jaar te staan. Volgens hom is ons nou in die Dvapara Yuga en het ons reeds die oorgangsperiode oorgesteek. Die laagtepunt van die Kali Yuga, die tyd waar die laaste Kali Yuga van die dalende siklus en die eerste Kali Yuga van die stygende siklus ontmoet, was omstreeks 498 n.C. Die volgende hoogtepunt van volmaaktheid sal volgens sy berekening omstreeks 12500 n.C. bereik word.

Die Yuga-siklusse volgens Sri Yukteswar.

Hoewel die telling in goddelike jare die gewildste is, stem dit nie ooreen met enige bekende ruimtebeweging nie. Die waarde van 24 000 jaar van die telling in menslike jare is egter redelik naby aan die moderne sterrekundige berekening van een volle aksiale presessie van die aarde (25 772 jaar).[nota 1] Die yuga-siklus kan dalk op die een of ander manier op ruimtebewegings geskoei wees.

Notas

  1. ↑ Hierdie verskynsel word waargeneem met die retrograde verskuiwing van die sterre teen sowat 50 boogsekondes per jaar en is vermoedelik verantwoordelik vir die siklusse van warm en koue tydperke bekend as die Milanković-siklus.

Verwysings

  1. ↑ Whicher, Ian The Integrity of the Yoga Darśana, 1998 SUNY Press, 110
  2. ↑ Feuerstein, Georg The Shambhala Encyclopedia of Yoga, Shambhala Publications, 1997
  3. ↑ 3,0 3,1 "vedabase.com, Srimad Bhagavatam 3.11.19". Geargiveer vanaf die oorspronklike op 5 Mei 2017. Besoek op 7 Mei 2017.

Eksterne skakels