Cha (Arabischer Buchstabe)

Ḫāʾ oder Cha ( خاء ) isch de sibet Buechstabe vom arabische Alphabet und het de Zaalewert 600. I de Früezit isch de Buechstabe nöd vom Ḥāʾ underschide worde, denn het mer aber zur gnaue Underschaidig bim Ḫāʾ en Punkt drüber gschribe.

S Ḫāʾ isch en stimmlose velare Frikativ (IPA /x/) und entsprecht em alemannische "ch" im Wort "Struuch". D DMG-Umschrift transkribiert de Buechstabe mit "ḫ", aso e "h" miteme Bögli unedra. I de nödwüsseschaftliche Literatur werd er im Tütsche mit "ch" widergee und im Französische und Englische mit "kh". I Domainname und Internetfore werd de Buechstabe nöd selte mit de Zaal 5 widergee.