Estudiant

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Estudiants en una aula d'a Universitat de Helsinki.

Un estudiant ye qui se dedica a lo estudio de conoixencias, aprendizaches u practica sobre bella materia, arte u profesión.

Etimolochía

L'uso actual d'a palabra "estudiant" provién d'a Edat Meya. Ye o resultato d'una deformación d'o significato d'a palabra latina "studere" y lo suyo substantivo "Studium". "Studere" se podria traducir como esforzar-se, u mes correctament "posar zelo a", ya que este verbo latino siempre se feba servir con un complemento. Dimpués un estudiant en a epoca romana yera belún que s'esforzaba, no belún que aprendeba, estos zaguers yeran ditos "discipuli" ("disciplos") o que se traduz como "aprendedores". Encara mes, la matriz d'este verbo la trobamos en o griego "spudatzo", que tiene o mateix significato que en o latín, però con un emfasi muito mes gran.

Curiosament os griegos nunca no facioron servir este verbo pa designar a qui teneba como oficio l'aprender, pus nunca lo consideroron un oficio especialment esforzato. L'uso actual d'a palabra estudiant pa qui aprende la podemos trobar en os monesterios medievals y particularment en Sant Tomás d'Aquino, qui reflexionó sobre a etimolochía d'a palabra "estudio" y dició que os qui abandonaban a busca d'a verdat yeran qui no yeran disposatos a esforzar-se a trobar-la, a fer o sacrificio d'a vida ascetica pa arribar-ie, per tanto qui quiere arribar a la verdat, u qui a la fin bi arriba ye o estudiant, o esforzato, y d'allí que s'encomenzó a dicir estudiants a os monches, que se dedicaban a mirar a Dios y la verdat. Dimpués o termin s'estendilló a tot o qui miraba a verdat en un aria determinata d'a conoixencia, y en una zaguera deformación s'encomenzó a dicir "estudiant" a tot o qui se dedicaba a aprender.

En aragonés medieval ye documentata a palabra studiant:

Testes fueron a las sobreditas cosas Xemeno de Escuer scudero e Pedro Lafuent estudiant de Entramacastielha habitadores, los cuales ambos...
Et fueron testimonios cuanto a la dicha firma feyta por el dito concello de Longares mosen Domingo Pérez clérigo habitante en el dito lugar de Longares et Domingo Frayelo studiant habitante en Çaragoça.

Y lo podemos veyer tamién en a traducción herediana d'o libro Secreto Secretorum:

O doctor noble gouernador de iusticia yo declaro ala tu sauieza que yo falle en t(ier)ra delos persanos. vnas gentes abastantes de razon et de entendimiento traspassable estudiantes en senyorear se sobre los otros et mas ganar el Regno por la cual razon nos auemos ordenado et propuesto de matar los a todos por quelo quete paresçe sobre aquesto declara nos lo portus letras al cual aristotil respuso assi.

Ciclos d'amostranza

Espanya

  • Educación Infantil dica os 3 anys
  • Educación Infantil Obligatoria entre os 3 y 5 anyos
  • Educación Primaria Obligatoria entre os 6 y 12 anyos
    • Primer de primaria
    • Segundo de primaria
    • Tercer de primaria
    • Cuarto de primaria
    • Cinqueno de primaria
    • Seiseno de primaria
  • Educación Secundaria Obligatoria entre os 12 y os 15 anyos
    • Primero d'E.S.O.
    • Segundo d'E.S.O.
    • Tercero d'E.S.O.
    • Cuarto d'E.S.O.
  • Bachillerato entre os 16 y os 18 anyos
    • Primer de bachiller
    • Segundo de bachiller
  • Ciclos Formativos a partir de 16 anyos
  • Estudios Universitarios a partir de 18 anyos

Veyer tamién

  • Consello estudiantil.

Vinclos externos