التنظيم (لبنان)
| ||||
|---|---|---|---|---|
 | ||||
| البلد |  |
|||
تعديل  |
||||
حركة المقاومه اللبنانيه المعروفه بإسم التنظيم , هى جماعه سياسيه قوميه لبنانيه مسلحه بدأها عدد من الناشطين اليمينيين المسيحيين فى اواخر الستينات و انضمت خلال الحرب الاهليه لائتلاف احزاب اليمين المسيحى المعروف بإسم الجبهه اللبنانيه فى مواجهة احزاب اليسار و القوميين العرب .
النشأه
التنظيم ظهر لأول مره سنه 1969 على ايد مجموعه من الشباب الكتائبيين اللى كانو رافضين اتفاق القاهره 1969 , و ده خلاهم ينفصلوا عن حزب الكتايب اللى كان رافض وقتها تسليح المسيحيين اللبنانيين للدفاع عن لبنان ضد اللى اعتبروه "خطر فلسطيني" . المجموعه المنشقه عن الكتايب كانت بقيادة عباد زوين , و كان افرادها كلهم من الكتائبيين القدام اللى ساعدوا كميل شمعون وقت ازمة 1958 . عباد زوين و مجموعته بدأوا التجهيز للتنظيم من سنه 1970 قبل الحرب الاهليه ما تبتدى بخمس سنين , و فتحوا اول مقر ليهم فى حى الاشرفيه فى بيروت و بدأوا فى تجنيد المتطوعين و تدريبهم و تسليحهم . كوادر التنظيم كان اغلبها من الطبقه المتوسطه اللى اتعلموا تعليم كويس , و ده ساعدهم على تكوين جناح سياسى تحت اسم "حركة الارز". اللوجو بتاع التنظيم هوه خريطة لبنان مكتوب عليها "تحبه ,, إعمل ليه" . ديزاين اللوجو ظهر للمره الاولانيه فى السبعينات خلال حملة التنظيم لإعادة اعمار قرية كفار شوبا الجنوبيه بعد ما تم قصفها من الاسرائيليين . القريه اغلب سكانها من المسلمين و ده بشكل ما ممكن يعكس توجه علمانى عند التنظيم . لكن حركة التنظيم على الارض و تكوين افرادها اللى كلهم من المسيحيين الموارنه متعارضه مع التوجه العلمانى اللى باين من اللوجو.
الهيكل التنظيمى
من اول ما ابتدت حركة المقاومه اللبنانيه التنظيم و هى رافضه لنمط القياده المركزيه اللى كان بيميز طريقة عمل الاحزاب اللبنانيه التقليديه , و عشان كده شكلوا هيئة منتخبه للقياده , اعضاءها بيتغيروا كل شويه و سموها "المجلس القيادي" . لكن الهيكل التنظيمى ده ما منعش من ظهور شخصيات قياديه مسيطره زى الدكتور فؤاد الشمالى سنه 1972 و اللى جه من بعدو المحامى جورج عدوان سنه 1973 . التنظيم اشرف على تجنيد و تدريب و تسليح متطوعين مسيحيين كتير , و كان بيموّل و بيدير عدد من معسكرات التدريب فى منطقة كسروان الجبليه بالتعاون مع حزب الكتايب . و بنهاية السبعينات كان تم تدريب اكتر من 15000 متطوع و متطوعه فى معسكرات التنظيم , بس اغلبهم كان بينضم لميليشيات مسيحيه تانيه غير ميليشيا التنظيم بسبب ضعف التمويل بالمقارنه بتمويل الميليشيات التانيه , و كمان بسبب الطبيعه الخاصه للتنظيم اللى كان بينقى احسن العناصر من المتطوعين . بشكل خلّا التنظيم مشهور بإنه كان بيوقع من صفوفه اقل عدد من القتلى و الاصابات , و انه كان دايم بيقدر يقوم بالمهمات الصعبه اللى كانت الميليشيات التانيه مابتقدرش تقوم بيها. فى اوائل السبعينات التنظيم كان بيستقبل دعم مالى و اسلحه من حزب الكتايب و الجيش اللبنانى الرسمى , بشكل خلّا بعض المراقبين يرجحوا ان التنظيم بيضم اسامى فى قيادة الجيش اللبنانى نفسو . و مع قيام الحرب الاهليه , اعضاء التنظيم كان بيحاربوا كأنهم وحده للعمليات الخاصه بتتحرك حسب متطلبات المهمه . و كانو على درجه عاليه جداً من التدريب و المهنيه و الانظباط , لدرجة انهم كانو الفريق الوحيد فى الحرب الاهليه اللى خرج من غير مكاسب على الارض سواء مناطق نفوذ او غنايم (باستثناء ميليشيا حراس الارز) . التنظيم كمان كانو مشهورين انهم الفريق الوحيد اللى ماتورطش فى تجارة المخدرات زى اغلب الفرق التانيه فى الحرب.
الايديولوجيا
التنظيم كان بيضم مقاتلين من خلفيات حزبيه مختلفه , و عشان كده كانو بيعتقدوا ان اللى بيوحدهم هوه حريه و سيادة و تعددية لبنان كوله لكل اللبنانيين . لكن الحقيقه ان تكوين التنظيم كان من المسيحيين الموارنه , و كانو قوميين فينيقيين بشكل متطرف , و كانو ضد الوجود الفلسطينى و العربى عموم فى لبنان , و بالتبعيه كانو رافضين القوميه العربيه . التوجه الايديولوجى للتنظيم كان مشابه فى تطرفه لحراس الارز , و وصلو فى بعض الاحيان لكتابة المراسلات باللغه اللبنانى المكتوبه بالحروف اللاتينى لمقاومة العروبه و التعريب.
دور التنظيم فى الحرب الاهليه
المقاومة (التنظم )قامت بدور مساعد للجيش اللبنانى فى عملية السيطره على المسلحين الفلسطينيين فى مخيم برج البراجنه فى مايو 1973 . لكن البدايه الحقيقيه للتنظيم كحركة المقاومه اللبنانيه مستقله كانت فى الحرب الاهليه اللبنانيه نفسها اللى خاضوا فيها معارك شرسه اهمها معركة الفنادق . اعضاء التنظيم كانو من ضمن الميليشيات المسيحيه اللى قامت بمدبحة الكرنتينا و مدبحة تل الزعتر , و ده لفت الانتباه ليهم فى اول الحرب بسبب مستوى كفاءتهم القتاليه اللى خليتهم جزء مهم من الجبهه اللبنانيه رغم ان عددهم وقتها مكانش يكمل 200 مقاتل . و فى يناير 1976 بعد تفكك الجيش اللبنانى الرسمى , ميليشيا التنظيم قامت بحمله لحماية و تأمين القواعد العسكريه و مبانى الجيش المهجوره اللى كان من ضمنها وزارة الدفاع اللبنانيه , و دى كانت فرصه لمضاعفة مخزون السلاح و ضم العناصر الهربانه من الجيش النظامى لصفوف التنظيم . و فى مارس 1976 كان عدد اعضاء مليشيا التنظيم وصل 1500 مقاتل مدعومين بعدد من المدرعات و الاسلحه التقيله و عربيات الجيش . و ده سمح لميليشيا التنظيم بمساحه اكبر فى الحركه , و ساعدهم على لعب دور مؤثر فى المعارك الشرسه خلال حرب الجبل . و سنه 1977 انضموا رسمى كجزء من القوات اللبنانيه بقيادة بشير الجميل و كان ليهم دور قوى فى طرد الجيش السورى من بيروت الشرقيه فى فبراير 1978.
