Der Spiegel

Der Spiegel (n'alemán, "L'Espeyu"), ye la mayor revista selmanal d'Europa y la más importante d'Alemaña. Publicada n'Hamburgu, tien un espardimientu selmanal d'un millón d'exemplares. El so estilu ye similar al de les norteamericanes Time o Newsweek. Ye conocida n'Alemaña por el so estilu distintivu y académicu, asina como pola so bultable influencia. Una edición media tien unes 170 páxines, con dos de conteníu por caúna de publicidá.

Historia

La primer edición de Der Spiegel foi publicada'l 4 de xineru de 1947. Antes d'esta fecha yá hubiera otra revista col nome de Diese Woche ("Esta selmana"), empecipiada en 1946 sol patrociniu de l'alministración británica d'ocupación n'Alemaña. Dempués de dellos desencuentros colos británicos, la revista pasó a ser propiedá del principal editor del país, Rudolf Augstein, quien-y dio'l nome actual. Augstein foi editor y redactor xefe de la revista dende la primer publicación en xineru de 1947 hasta la so muerte, el 7 de payares de 2002.

A partir de 1950, la revista foi propiedá d'Augstein y John Jahr, que la so parte foi tomada por Richard Gruner en 1962. En 1969, Augstein convirtióse en dueñu únicu de la revista, en mercando la parte de Gruner por 42 millones de marcos alemanes. En 1971 Gruner y Jahr xuniéronse pa mercar el 25% de la empresa. En 1974, producióse una reestructuración de la compañía, según la cual tou emplegáu que trabayara na revista mientres más de tres años tendría derechu a participar na xerencia y beneficios.

Dende 1952, Der Spiegel ocupó'l so propiu edificiu na parte vieya de Hamburgu.

Escándalos desanubiertos

Der Spiegel estremóse por atopar corrupciones polítiques y crear escándalos, ganándose l'apellativu de "Sturmgeschütz der Demokratie" (arma d'asaltu de la democracia). Ello ye que la revista fíxose famosa nel añu 1950, cuando'l parllamentu federal tuvo que faer una investigación sobre les acusaciones de la revista, según la cual, parllamentarios sobornaos ayudaren a que fora Bonn (y non Frankfurt) la sede del gobiernu de la República Federal Alemana.

Sicasí, foi col llamáu "escándalu Spiegel" (1962), cuando la revista ganóse definitivamente la imaxe de defensora de la democracia. Dempués d'un artículu criticando la baxa preparación del exércitu alemán, el líder conservador y ministru de defensa Franz Josef Strauß empecipió una investigación contra'l selmanariu, qu'acabó n'ataques a les oficines del Spiegel y la detención de dellos editores y l'autor del artículu, acusaos de traición. El casu llegal terminó llueu, y tuvo como consecuencies el cese de dellos de los miembros del gabinete de Konrad Adenauer. El discutiniu foi vistu como un ataque a la llibertá de prensa, col Spiegel como líder na defensa de dicha llibertá. De magar, Der Spiegel xugó un papel esencial nel descubrimientu de dellos casos de corrupción política.

Nel añu 2010 foi unu de los periódicos que publicaron los documentos secretos (Diarios d'Afganistán y Rexistros de la guerra d'Iraq) del Departamentu d'Estáu de los Estaos Xuníos peneraos pol militar d'Estaos Xuníos Chelsea Manning a la web Wikileaks.^[1] Nos años 2013 y 2014 foi unu de los periódicos que, a nivel internacional, foi publicando documentos d'altu secretu peneraos pol ex analista de les axencies d'intelixencia CIA y NSA, Edward Snowden, que revelaron la esistencia d'una estensa rede de vixilancia a nivel mundial caltenida per dellos países (vease: Datos alrodiu de la vixilancia mundial).^[2][3]

Crítiques

Una de les principales crítiques recibíes pol Spiegel refierse al llinguaxe usáu pola revista. Nos sos primeros años, importantes autores acusáronlu de "estrozar" l'idioma alemán. Tou esto camudó nos años noventa. Dempués de contratar a dalgunos de los meyores escritores alemanes, convirtióse nún de los guardianes del llinguaxe, incluyendo una columna na so edición dixital (Zwiebelfisch), que llegó a convertise nun llibru d'ésitu.

Otros acusen a la revista de contratar a antiguos nazis y oficiales de les SS, llegando a aburuyar el pasáu pa salvar la imaxe de los escritores.

Desque Stefan Aust tomara'l poder en 2002, al selmanariu acúsase-y de movese a la derecha política, pasando de sofitar al gobiernu eco-socialista a caltener un enclín neolliberal.

Crecedera

La circulación de Der Spiegel aumentó rápido, al igual que la so influencia. Dende les 15.000 copies iniciales en 1947, creció hasta les 65.000 al añu siguiente, y 437.000 en 1961. Nos setenta algamó les 900.000 copies, y superó la barrera del millón d'exemplares nos años noventa, gracies a los nuevos llectores de l'Alemaña Oriental. La so poderosa influencia basóse nos múltiples casos d'investigación y el poder de la so casa editorial, que tamién produz programes de televisión.

En 1993, la compañía editorial Burda llanzó la revista Focus, diseñada como una alternativa a Der Spiegel, con un mayor enclín al conservadorismu. Tuvo ésitu, llegando a tener una circulación próxima a la del Spiegel, anque ta considerada intelectualmente inferior.

Spiegel Online

La edición dixital, Spiegel Online (embrivíu SPON) foi llanzada en 1994. Ye la revista dixital más visitada n'Alemaña. Publica artículos de la mesma redaición de la revista xunto con otros d'axencies. Inclúi dellos artículos de la edición impresa ensin nengún costu. El restu de la edición impresa puede llograse en formatu PDF previu pagu.

Spiegel Online foi'l primer mediu n'informar de la responsabilidá d'Al-Qaeda nos atentaos del 7 de xunetu de 2005 en Londres.

Redactores xefe de Der Spiegel

• 1962-1968 : Claus Jacobi
• 1968-1973: Günter Gaus
• 1973-1986: Erich Böhme y Johannes K. Engel
• 1986-1989: Erich Böhme y Werner Funk
• 1989-1994: Hans Werner Kilz y Wolfgang Kaden
• 1994-2008: Stefan Aust
• 2008-2013: Mathias Müller von Blumencron y Georg Mascolo
• 2013-2014: Wolgang Büchner

Referencies

Enllaces esternos

• Páxina oficial de la revista (n'alemán)
• Edición Internacional n'inglés