Valdés ye ún de los conceyos más grandes del Occidente asturianu. Tien una población de 12,421 habitantes y una densidá de población de 37,82 hab. per km². La so capital ye Ḷḷuarca y llenda colos conceyos de Navia, Villayón, Tinéu, Cuideiru y Salas.
Xeografía
Llenda al norte col mar Cantábricu, al este con Cuideiru y Salas, al oeste con Navia y Villayón y al sur con Tinéu y Salas. Ye un conceyu costeru con un gran númberu de sableres y cantiles, y xunto a ellos un paisaxe montañosu pal interior con grandes como'l de Paredes o Muñas y sierres montañoses como Las Palancas, Estoupo o Belén de la Montaña. El so puntu de mayor altor ye la Peña Cezures con 1.010 ms.n.m.
Hidrografía
Dientro la so rede hidrográfica, dos son los ríos más importantes, l'Esva y el ríu Negru, que desemboca na capital del conceyu. L'Esva entra nel conceyu pela parroquia de Paredes, traviesa'l conceyu de sur a norte percorriendo un total de 29 km, recibiendo'l nome de ríu Canero al entrar na vega del so mesmu nome. El ríu Negru porvien de la montaña na llende col conceyu de Villayón, percuerre un total de 19 km. hasta llegar a la capital, partiéndola en dos. Dambos ríos tuvieron siempre abondes truches, siendo l'Esva amás ún de los salmoneros d'Asturies.
Historia
Los primeros restos materiales nel conceyu Valdés atópense nel cabu de Busto y pertenecíen a cazadores-recolectores, fechaos va más de 300.000 años. Xunto a ellos atópense necrópolis tumulares en La Granda, San Pelayo, La Ronda, Piedrafita y Vil.luir y restos de la cultura castreña nel Cercu de los Mouros, Paredes y El Castiel.lu d'Otur.
Tamién hai restos d'industria romana d'estracción d'oru na cuenca del ríu Esva.
El Conceyu de Valdés afítase'n 1270[1] al traviés la carta fundacional de la Pola de Valdés por fueru d'Alfonsu X el Sabiu. De magar entós Ḷḷuarca convertiríase nel nucleu económicu, políticu y alministrativu del conceyu.
El desendolcu del conceu básase nel drechu a la esplotación maderera, la pesca o la circulación de bienes o la importación y comercialización de la sal (de magar 1338), que resultó nuna actividá artesana y mercantil intensa. El sector socio-económicu tien como fitu principal la ordenación de toles actividaes relacionaes col sector pesqueru cola constitución en 1486 de la Ordenanza del Nobilísimu Gremiu de Mareantes.
Asina, na Edá Media, l'actividá económica principal del conceyu ye la esplotación de bienes marítimos, que non solo alimentó a la so población sinón que dio llugar a una producción excedentaria que crearía un mercáu llocal y llevaría a la esportación a mercaos asturianos y estranxeros, sobremanera a tierres castellano-lleoneses.
Llingua
La fala del conceyu de Valdés encuadrase dientru del Asturianu occidental, concretamente dientru de la subvariedá nomada comu Asturianu occidental C, conocíu popularmente en Valdés comu "La falieḷḷa".
Delles son les etapes nes que podemos estremar la evolución de la población nel conceyu de Valdés nel sieglu XX y principios del sieglu XXI. Desque a principios del sieglu XX, Valdés presenta una cifra de unos 26.000 habitantes, ésta mantúvose ensin cambeos hasta la década de los sesenta, fecha na cual esta tendencia rompióse de manera sópita, produciéndose nel siguiente censu un descensu de casi 6.000 persones, deriváu sobremanera d'una fuerte emigración. La década de los 70 y 80 déxanos una leve variación positiva nel fluxu poblacional, recuperándose un pocu la cifra, situación esta pasaxera, pos a partir d'esti momentu, la evolución vuelve tornase negativa, durando esta etapa hasta los nuesos díes na que tenemos una cifra de 10 895 habitantes (2024)[3][4]
El fenómenu migratoriu siempres tuvo bien presente na vida de Valdés, siendo los destinos ultramarinos los escoyíos pola población nueva de Valdés nos empiezos del sieglu XX, destín que cambió a mediaos de sieglu, onde les árees centrales asturianes, españoles y europees llevaron munchos d'estos movimientos. Del mesmu xeitu, la población medra enforma en branu.
La demografía amuésanos un avieyamientu de la población, sobremanera nes zones del interior, que cunten con una población más reducida que nes zones costeres. Los llugares costeros con más población son Ḷḷuarca, Trevías, Almuña, Cadavéu y Barcia.
Economía
Emplegaos nos diversos sectores económicos (añu 2009)
Númberu de trabayadores
Tantu por cientu
TOTAL
4.023
100
Agricultura, ganadería y pesca
995
24,73
Industria
327
8,13
Construcción
422
10,49
Servicios
2.279
56,65
* Datos tomaos del Anuariu Estadísticu d'Asturies 2009, SADEI
Usos del suelu del conceyu (añu 2009)
Usu
Superficie (km²)
Tierres de llabrantíu
18,47
Praderíes
76,48
Terrenu forestal
201,43
Otros usos (industrial, residencial, tierra ermo...)
57,14
* Datos tomaos del Anuariu Estadísticu d'Asturies 2009, SADEI
Carauterístiques del sector primariu (añu 2009)
Ganaderíes de bovín
721
Cabeces de ganáu bovín
18.071
Cabeces de ganáu ovín
1.089
Cabeces de ganáu cabrín
258
Ganaderos con cuota llechera
320
Quilos de cuota llechera
63.533.005
Metros cúbicos de madera valtao
50.818
* Datos tomaos del Anuariu Estadísticu d'Asturies 2009, SADEI
En branu celébrase'l Festival Vaqueiru y de la Vaqueirada na Braña d'Aristebano, y l'últimu domingu de xunetu una boda vaqueira. Les fiestes más populares son la del Rosariu (15 d'agostu) y San Timoteo (22 d'agostu) en Ḷḷuarca o el de La Regalina en Cadavéu l'últimu domingu d'agostu.
España
Principáu d'Asturies
