Ідзу-Осіма

Ідзу-Осіма
яп. 伊豆大島
Выгляд з паветра
Выгляд з паветра
Характарыстыкі
Плошча91,05 км²
Насельніцтва8 179 чал.
Шчыльнасць насельніцтва89,83 чал./км²
Размяшчэнне
34°44′ пн. ш. 139°24′ у. д.HGЯO
АкваторыяЦіхі акіян
Краіна
Ідзу-Осіма (Японія)
Ідзу-Осіма
Ідзу-Осіма
Лагатып Вікісховішча Медыяфайлы на Вікісховішчы

І́дзу-О́сіма (яп.: 伊豆大島), або О́сіма (яп.: 大島, літаральна «вялікі») — найбуйнейшы востраў архіпелага Ідзу. Уваходзіць у склад Японіі. Тэрыторыя — 91,05 км². Насельніцтва (2015 г.) — 8 179 чал.

Геаграфія

Карта

Востраў Ідзу-Осіма знаходзіцца ў 22,6 км ад вострава Хонсю, у 104 км на паўднёвы захад ад цэнтра Токіа. Даўжыня — 15 км, найбольшая шырыня — 9,22 км.

Востраў мае вулканічнае паходжанне. Вулкан Ідзу-Осіма займае цэнтральную частку сушы. Яго вяршыня, гара Міхара, дасягае 764 м у вышыню. Для вулкана характэрны частыя вывяржэнні — прыкладна кожныя 2 — 3 гады. Першае вядомае вывяржэнне зафіксавана ў пісьмовых крыніцах пад VII ст. н. э. Востраў складзены пераважна базальтамі. Тут шмат маляўнічых скал. У раёне вулкана маюцца гарачыя крыніцы. Заходні і паўночны берагі спадзістыя, з пясчанымі пляжамі.

Клімат вільготны субтрапічны. У лютым сярэдняя тэмпература не апускаецца ніжэй за +3,1 °C, а ў жніўні не паднімаецца вышэй за +27,6 °C. Сярэднегадавая норма ападкаў — 2831 мм. У летні сезон часцяком здараюцца разбуральныя тайфуны.

Прырода

Востраў знакаміты сваімі кветкамі, якія сустракаюцца нават у зімовы сезон. Асабліва астравіцяне ганарацца чырвонымі камеліямі. Захаваліся першародныя лясы, дзе можна сустрэць ядавітых змей. На скалах гняздуюць птушкі.

Гісторыя

Востраў Ідзу-Осіма быў населены ў каменным веку. Археолагамі былі выяўлены рэшткі керамікі перыяду дзёмон. З ранняга сярэднявечча на востраве сяліліся выгнаннікі і прыхільнікі будысцкай містычнай секты сюгендо.

З канца XIX ст. развіваюцца прамысловае рыбалоўства і турызм.

У 1933 г. японскія газеты паведамілі пра тое, што на гары Міхара, якую мясцовыя жыхары шануюць як бога агню, скончыла самазабойствам дзяўчына. Гэта прывяло да таго, што сярод схільных да суіцыду з’явіўся звычай прыязджаць для самагубства на Ідзу-Осіма. Пік «паломніцтваў» самазабойцаў выпаў на 1936 г. Усяго да канца II Сусветнай вайны на гары Міхара скончыла самагубствам каля 3 тысяч чалавек.

Інфраструктура

З афіцыйнага пункту гледжання востраў Ідзу-Осіма складае адзіны муніцыпалітэт, хаця на яго тэрыторыі існуе некалькі населеных пунктаў. Порт знаходзіцца ў паселішчы Акада. Адміністрацыйны цэнтр — у паселішчы Матамачы. Асноўныя галіны эканомікі — рыбалоўства і турызм. Наведвальнікаў прыцягваюць мясцовая маляўнічая прырода, а таксама натуральныя гарачыя бані. На востраве працуе музей вулканаў.

Спасылкі