Мірдза Бэндрупэ

Мірдза Бэндрупэ (лат.: Mirdza Bendrupe; 23 кастрычніка 1910 — 30 ліпеня 1995) — латышская паэтэса, пісьменніца і перакладчыца.

Нарадзілася ў Латвіі. У 1914 годзе сям’я пераехала ў Маскву, у 1917 годзе пасля хваробы і смерці бацькі вярнулася ў Латвію. Вучылася ў Елгаве, у 1926 годзе надрукавала ў газеце першы верш. У 1928 годзе скончыла класічную гімназію ў Рызе. Працавала машыністкай, перакладала для Латвійскай нацыянальнай оперы. У 1936—1939 гг. замужам за пісьменнікам Янісам Скучам.

Пасля заканчэння Другой сусветнай вайны працавала на Рыжскай кінастудыі старэйшым рэдактарам (1947—1948), пазней перакладчыцай тэкстаў, займалася дубляжам фільмаў. У 1956 годзе прынята ў Саюз пісьменнікаў СССР.

У 1957 годзе ўпершыню пабывала ў Крыме. На працягу некалькіх гадоў прыязджала сюды, пакуль у сярэдзіне 1960-х гадоў не пасялілася ў Планерскім (Кактэбель), дзе жыла да 1978 года.

Апошняй буйной працай Бэндрупэ, выкананай ужо ў перыяд аднаўлення незалежнасці Латвіі, быў пераклад Бхагавадгіты (1995).