Davâr

Davâr al è un comun in Cjargne, che in dì di vuê al fâs part de provincie di Udin e al à 2.218 abitants.

Il comun si cjate tal Cjanâl di Guart, in Cjargne. Al è logât intun cjadin tra il Col Zentîl (2.075 m) a bonât e il Norvenas (1.968 m) a jevât, cun la masse dal Colians che domine la valade. In plui che il cjâf lûc, a fasin part dal comun ancje lis frazions di:

• Negrons m 523

• Cela m 494

• Cjalina m 532

• Clavaias m 826

• Cludini m 720

• Dentramp m 541

• Lençon m 614

• Liaries m 695

• Luvincas m 518

• Luvint m 621

• Mion m 710

• Muina m 526

• Davasta m 745, che a gjolt di une ministrazion separade frazionâl dai ûs civics.

Al somearès che il non Davâr al vegni di une peraule celtiche che ûl dî "lûc protet". Di fat il paîs al è logât in chê che e je simpri stade une impuartante zone di passaç fin de preistorie. Cuant che i romans a baterin i Gjai Cjargnei che a vivevin culì, il teritori di Davâr, come chel di dute la Cjargne, al jentrà a fâ part de X REGIO VENETIAE ET HISTRIAE. Te etât di mieç al fasè part dal Partiarcât di Aquilee fin al 1420, cuant che i venezians lu concuistarin. Cussì Davâr al restà sot Vignesie fin al 1797 cuant che, cul Tratât di Cjampfuarmit, al fo cedût al Imperi Austro-Ongjarês. Davâr al fo concuistât de Italie tal 1866, dopo da la tiarce vuere di indipendence. Te storie di Davâr si regjstraran però ancjemò dôs ocupazions: la prime tal 1917, cuant che dopo la rote di Cjaurêt dut il Friûl al fo invadût di bande dai austro-todescs. La seconde e fo tal 1944 cuant che i Cosâcs, clamâts culì di Hitler, a ocuparin la Cjargne; propite i Cosâcs, sul pont di ritirâsi, ai 2 di mai dal 1945 a Davâr coparin 22 omps, parcè che a jerin stâts tacâts dai partigjans

A Davâr al ven fevelât il cjargnel te variant dal bas Cjanâl di Guart, caraterizât de terminazion des peraulis femininis in -a (singolâr) e -as (plurâl). Un altri trat carateristic de zone di Davâr al è la conservazion dai ditoncs ei e ou là che tal furlan centrâl a si an î e û (misteir e fouc par mistîr e fûc).

In ogni frazion dal comun, però, si à cualchi variazion; a Muina par esempli no si cjatin i ditoncs ei e ou, a Liariis, Mion e Cele invezit il plurâl des peraulis femininis al è in -es.

• La Plêf di Guart, logade insomp un cuel fra Cela e Negrons, citade pe prime volte tal 1119, ma siguramentri ancjemò plui viere. In dì di vuê però la glesie, par vie dai varis teremots, e à un aspiet sietcentesc.

• Il Palaç Micoli Toscano a Mion, tirât sù de famee dai Toscjans. La costruzion da l'edifici e terminà tal 1836, e in dì di vuê al è cognossût come Il palaç dai cent barcons.

• La Cjase Di Cort a Davasta, dal XVIII secul, carateristic esempli di architeture cjargnele.

• Il Mulin, in localitât Baûs, fra Davâr e Comelians. Si trate di un vieri mulin ancjemò funzionant, che al permet di viodi cemût che une volte si masenave la blave.