Verzegnis

Verzegnis (loc. Verzegnas) al è un comun inte Cjargne, che al dì di vuê al fâs part de provincie di Udin e al à 908 abitants.

Al è un dai 28 comuns de Cjargne.

I cuatri cûrs abitatîfs a son:

• Cjaicis (loc. Cjaiças)
• Cjaulis (loc. Cjaulas/Cjauias) - alì che al è logât il municipi -
• Dintissans (loc. Dintissjans)
• Vile (loc. Vila).

Insiemit cui trê abitâts minôrs:

• San Stiefin,
• Ruviâs
• Marzovalis (loc. Marzovalas) - chest ultin svilupât a scomençâ dai agns '80 -

ducj unîts a van a formâ il comun che al cjape il non di Verzegnis. Non che al è ancje chel da la mont che dal alt e domine lis cuatri frazions e il so lâc artificiâl (creât tal 1957 inclostrant la corint dal riu Dimbieste (loc. Dimbiessjta)).

In antîc a esistevin cinc altris centris abitatîfs:

• Dassais (loc. Dassaias)
• Duebis (loc. Dueibas)
• Pusea (loc. Pusjea)
• Pocis (loc. Poças)
• Fuignis

bandonâts definitivementri tal cors dal 1900 dai abitants origjinaris (par solit daûr da la calade viers lis frazions plui grandis). Ultimementri e je stade regolade cualchi cjase a Pocis (la plui part pe int foreste). Dassais, dongje, nol è dal dut disabitât, di fat cualchidun al è a stâ in chest abitât. Inte localitât Siele Cjalçutan (loc. Sela Cjalçutan), cualchi an fa, di dicembar a març a jerin vierts implants di schi (dôs pistis calade e une di font) che, di cualchi an, a son stâts inutilizâts. In Cjaicis (loc. Cjaiças) e je la scuele materne, invezit in San Stiefin e je la scuele elementâr dal paîs.