Laura Gemser

Laura Gemser
persoan yn de seksyndustry
Laura Gemser yn 'e film Emanuelle e gli Ultimi Cannibali (Emanuelle and the Last Cannibals) út 1977.
persoanlike bysûnderheden
oare artyste-        nammen	Moira Chen
echte namme	Laurette Marcia Gemser
nasjonaliteit	Nederlânsk Italjaansk
berne	5 oktober 1950
berteplak	Soerabaja (Yndoneezje)
etnisiteit	Javaansk Nederlânsk
wurkpaad
wurksum as	neakenmodel, softcore-aktrise, aktrise, kostúmûntwerpster
jierren aktyf	1974 – 1992 (as aktrise)
offisjele webside
Laura Gemser yn 'e IMDb

Laura Gemser (folút: Laurette Marcia Gemser; Soerabaja, 5 oktober 1950) is in rêstend Nederlânsk softcore-pornoaktrise, mainstream-aktrise en kostúmûntwerpster fan mingd Javaansk-Nederlânsk etnysk komôf. Hja makke yn 'e 1970-er jierren furoare yn 'e titelrol fan 'e sêft-pornografyske Black Emanuelle-filmrige. Letter spile se ek yn mainstream-films. Gemser hat no de Italjaanske nasjonaliteit en liedt in weromlutsen bestean yn Rome.

Gemser waard yn 1950 berne yn Soerabaja, op it Yndonezyske haadeilân Java. Hja is fan mingd Nederlânsk-Javaansk etnysk komôf. Yn 1955, doe't se fjouwer jier wie, emigrearre se mei har âlden nei Nederlân, dêr't se fierder opgroeide yn Utert. Se trochrûn de middelbere skoalle oan 'e Regentesseschool, dat in MULO wie. Neitiid folge se in oplieding moadeûntwerpen oan 'e Uterter Artibus Keunstakademy.

Nei't se as neakenmodel posearre hie foar ferskate neakenblêden yn Nederlân en Belgje, ferfear Gemser yn 1974 nei Itaalje, dêr't se de haadrol spile yn 'e eroatyske film Amore Libero – Free Love fan regisseur Pier Ludovico Pavoni. Dat waard in kassúkses yn 'e bioskopen. Op basis fan dat súkses waard oan Gemser yn 1975 de titelrol taparte yn 'e sêft-pornografyske film Emanuelle Nera (ynternasjonale titel: Black Emuanuelle), in fariaasje op it tema fan 'e oarspronklike filmsearje Emanuelle mei Sylvia Kristel yn 'e haadrol.

Black Emanuelle betsjutte foar Gemser de trochbraak, net inkeld yn Itaalje, mar ek ynternasjonaal. Neitiid waarden in stikmannich ferfolchfilms makke, wêrûnder Emanuelle Nera: Orient Reportage (Emanuelle in Bangkok, 1976), Emanuelle in America (1977), Suor Emanuelle (Sister Emanuelle, 1977), Emanuelle: Perché Violenza alle Donne? (Emanuelle Around the World, 1977), Emanuelle e gli Ultimi Cannibali (Emanuelle and the Last Cannibals, 1977) en La Via della Prostituzione (Emanuelle and the White Slave Trade, 1978).

Letter spile Gemser ek yn ferskate mainstream-films, wêrûnder de Amerikaanske tillefyzjefilm Love is Forever (1983), fan akteur en regisseur Michael Landon (benammen bekend fan The Little House on the Prairie). Dêryn fertolke Gemser de rol fan Keo Sirisomphone, in Laotiaanske flechtlinge. Fanwegen har pornografysk ferline stie Landon der lykwols op dat se foar de rol in skûlnamme oannimme soe, en sadwaande stie Gemser op 'e ôftiteling fan Love is Forever fermeld as Moira Chen.

Gemser troude mei de Italjaanske akteur Gabriele Tinti, mei wa't se yn ferskate films gearwurke. Har lêste filmrol hie se yn 1992. Dêrnjonken wie se fan 1988 oant 1992 yn 'e Italjaanske filmyndustry ek wurksum as kostúmûntwerpster. Yn 1991, doe't Tinti ferstoar, waard Gemser widdo. Troch har houlik hie se de Italjaanske nasjonaliteit krigen. Tsjintwurdich liedt se in weromlutsen bestean yn har wenplak Rome.

• (in) Folsleine filmografy fan Laura Gemser yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons  Ofbylden dy't by dit ûnderwerp hearre, binne te finen yn de kategory Laura Gemser fan Wikimedia Commons.