The Rise and Fall of Ziggy Stardust and the Spiders from Mars é un álbum conceptual do músico inglés David Bowie, publicado o 6 de xuño de 1972 a través do selo RCA Records. O disco acadou o número 5 no Reino Unido e o 75 na Billboard estadounidense.[1]
O álbum conta a historia do alter-ego de Bowie Ziggy Stardust, unha estrela de rock que actúa de mensaxeiro para seres estraterrestres. Bowie creou a Ziggy Stardust mentres estaba en Nova York promocionando Hunky Dory e actuou como el nunha xira polo Reino Unido, Xapón e Norteamérica[2]. O álbum, e a personaxe de Ziggy Stardust, foi coñecido polas súas influencias glam rock e as temáticas de exploración sexual e comentario social. Eses factores, xunto coa ambigüídade que rodeaba á sexualidade de Bowie e alimentados por unha interpretación innovadora de "Starman" no programa Top of the Pops[3], fixeron que se vise envolto en controversia e que dende entón sexa considerado un traballo seminal[4].
