Islam

Islam je jedna wot wulkich monoteistiskich swětowych nabožinow. Swjata kniha islama je koran. Nabožina załoži so w prěnjej połojcy 7. lětstotka wot profeta Mohammeda (tež Muhammad) na Arabskej połkupje w městomaj Medina a Mekka a rozšěrješe so potom spěšnje na cyłym Bliskim wuchodźe a w sewjernej Africe. Dźensa je we swěće něhdźe 1,6 miliardow muslimow, tuž je islam po křesćanstwje druha najwjetša swětowa nabožina. Hłownej prudźeni islama stej sunna a šia. Cyłk muslimskich wěriwych mjenuje so umma.

Je pjeć stołpow islamskeje wěry:

• wuznaće wěry (šahada)
• modlitwa (salat)
• wotedawk (sakat)
• posćenje (saum)
• putnikowanje (hadź)

Kraje z wulkej muslimskej ludnosću su:

• w Aziji: Afghanistan, Azerbajdźan, Bahrain, Bangladeš, Brunei, Indiska, Indoneska, Irak, Iran, Jemen, Jordaniska, Katar, Kazachstan, Kirgiska, Kuwait, Malajzija, Libanon, Oman, Pakistan, Sawdi-Arabska, Syriska, Tadźikistan, Turkmenistan, Turkowska, Uzbekistan, Zjednoćene arabske emiraty
• w Africe: Algeriska, Čad, Egyptowska, Gineja, Libyska, Mali, Marokko, Mawretanska, Niger, Nigerija, Senegal, Somalija, Sudan, Tuneziska
• w Europje: Albanska, Bosniska a Hercegowina, Kosowo

 Commons: Islam – Zběrka wobrazow, widejow a awdiodatajow

• Serbska terminologija wo temje