Völklingen
| ||
| Wopon | ||
|---|---|---|
| ||
| Zakładne daty | ||
| stat |  Němska
| |
| zwjazkowy kraj |  Posaarska
| |
| wokrjes | Regionalny zwjazk Saarbrücken | |
| wysokosć | 200 metrow n.m.hł. | |
| přestrjeń | 67,07 km² | |
| wobydlerstwo | 40.358 (31. dec 2023)[1] | |
| hustosć zasydlenja | 602 wob. na km² | |
| póstowe čisło | 66333 | |
| předwólby | (+49) 06898, 06802 | |
| awtowa značka | SB, (VK) | |
| Politika a zarjadnistwo | ||
| měšćanostka | Christiane Blatt (SPD) | |
| adresa | Rathausplatz 66333 Völklingen | |
| webstrona | voelklingen.de | |
| Połoženje we wokrjesu Regionalny zwjazk Saarbrücken | ||
wikidata: Völklingen (Q14876)
| ||
Völklingen je město z něhdźe 40.000 wobydlerjemi w Posaarskej, kotrež słuša do regionalneho zwjazka Saarbrücken. Wone je po Saarbrückenje, Neunkirchenje a Homburgu štwórte najwjetše město zwjazkoweho kraja.
Geografija
Město nadeńdźe so někotre kilometry zdalene wot krajneje stolicy Saarbrücken při brjoze rěki Saar. Měšćanske dźěle na lěwym boku rěki słušeja do regiona Warndt a mjezuja z Francoskej. W měšćanskim dźělu Wehrden wuliwa so rěčka Rossel do Saary.
Stawizny
Völklingen słuša k najstaršim sydlišćam w Posaarskej a bě hižo w keltiskej dobje wobsydleny. Za čas Romjanow bě na městnje dźensnišeho města w płódnej dolinje Saary wažne křižowanišćo za regionalny wobchad a hospodarstwo.
W zažnym srjedźowěku sta so sydlišćo w běhu zasydlenja Frankow mjez 5. a 9. lětstotkom ze srjedźišćom wokolnych wjeskow a statokow. Tule steješe jedne z třoch wuznamnych kralowskich kubłow při Saarje; nimo toho zetkaštej so dwaj wažnej pućej: čara z Köllerskeje doliny k Saarje ze starej romskej dróhu, wjedźacej ze Saarbrückena do Triera. Tak nabywa Völklingen wuznam w frankowskim zarjadnistwje a sudnistwje.
Dnja 27. oktobra 822 naspomni so wjes prěni raz pisomnje jako Fulcolingas. Hišće za čas Karolingow natwari so Völklingenska cyrkej swj. Měrćina. W slědowacych lětstotkach wostawaše Völklingen ratarske sydlišćo, kotrež podsteješe Saarbrückenskim hrabjam. Hakle w 19. lětstotku wuwiwaše so w běhu industrializacije do města. 1860 dósta dwórnišćo při nowej železniskej čarje Saarbrücken–Merzig–Trier; w lěće 1862 sta so ze sydłom hamtskeho sudnistwa. 1869 wotewri so druhi móst přez Saaru pola Wehrdena.
Swójbne předewzaće Röchling a jeho železniska hěta kaž tež wudobywanje wuhla přetworjachu Völklingen w běhu někotrych lět do wulkoindustrielneho centruma. Dźensa je město hišće sydło předewzaća Saarstahl AG.
Wuwiće wobydlerstwa
|
|
|
žórło: webstrona města Völklingen[2]
Wobchad
Přez Völklingen wjedźetej zwjazkowa awtodróha 620 (Saarlouis–Saarbrücken) a zwjazkowa dróha 51. Völklingenske dwórnišćo nadeńdźe so při čarje Saarbrücken–Trier. Zwiski wobsteja nimo tuteju městow do Koblenza, Kaiserslauterna a Mannheima. Město ma tež rěčny přistaw při Saarje.
Literatura
- Hans Peter Buchleitner: Vom Königshof zur Hüttenstadt, Völklingen 1950.
- Joachim Conrad (wud.): Wiege einer Stadt, Forschungen zur Martinskirche im Alten Brühl von Völklingen, Saarbrücken 2010.
Wotkazy
Commons: Völklingen – Zběrka wobrazow, widejow a awdiodatajow