400

400 (CD í rómverskum tölum) var 100. ár 4. aldar og hlaupár sem hófst á sunnudegi samkvæmt júlíska tímatalinu. Í Rómaveldi var það þekkt sem ræðismannsár Stilikós og Árelíanusar eða sem 1153 ab urbe condita. Það hefur verið þekkt í Evrópu sem árið 400 eftir að Anno Domini-ártöl voru tekin upp snemma á miðöldum.

Atburðir

9. janúar - Arkadíus keisari gaf eiginkonu sinni, Aílíu Evdoxíu, titilinn Augusta.
Óeirðir brutust út í Konstantínópel og Stórhöllin var brennd til grunna. 7000 gotneskir hermenn undir stjórn Gainasar voru króaðir af og drepnir samkvæmt skipun Arkadíusar.
Veturinn - Gainas leiddi leifar liðs síns yfir Dóná þar sem þeir voru drepnir í orrustu við Húna. Huldin Húnakonungur sendi Arkadíusi höfuð Gainasar.
Frankar settust að í norðurhluta Niðurlanda.
Vandalar hófu ferð sína vestur á bóginn frá Dakíu og Ungverjalandi.
Richū varð Japanskeisari.