Devoneyja
![](http://upload.wikimedia.org/wikipedia/commons/thumb/a/a0/Devon_Island%2C_Canada.svg/220px-Devon_Island%2C_Canada.svg.png)
![](http://upload.wikimedia.org/wikipedia/commons/thumb/a/ab/Patterned_ground_devon_island.jpg/220px-Patterned_ground_devon_island.jpg)
Devoneyja er eyja sem tilheyrir Núnavút-sjálfstjórnarhéraðinu í Kanada og er stærsta óbyggða eyja heims og sjötta stærsta eyja Kanada, 55.247 ferkílómetrar að stærð. Hún liggur á milli Baffinslands og Ellesmere-eyjar.
Verslunarstöð var reist í Dundas Harbour árið 1924 og árið 1934 voru 53 inuítafjölskyldur fluttar þangað frá Baffinslandi til að reyna að koma upp byggð á eynni en sú tilraun mistókst, enda er loftslag þar mun kaldara en á Baffinslandi og eyjan miklu vindasamari svo að fólkið yfirgaf eyna tveimur árum síðar. Önnur tilraun var gerð til að koma eynni í byggð nokkru síðar en hún fór endanlega í eyði 1951.
Sumarið á Devoneyju er aðeins 40-50 dagar, vetrarfrostið getur farið niður í 50 gráður og úrkoma er mjög lítil. Eyjan hefur verið notuð sem æfingastöð til að búa menn undir hugsanlega landgöngu á reikistjörnunni Mars.