დევანაგარი (სანსკ. देवनागरी devanāgarī „ღმერთთა ქალაქური“) — ინდური დამწერლობის ერთ-ერთი ფორმა. გამოიყენება სანსკრიტის, ჰინდის, მარათის და ზოგიერთი სხვა ენის და დიალექტის გრაფიკულად გადმოცემაში.
ყოველი თანხმოვანი დაკომპლექტებულია ხმოვნით „ა“, ანუ დევანაგარი ე.წ. მარცვლოვანი დამწერლობაა. ხმოვანი თანხმოვანთან პოზიციაში განსაკუთრებული ნიშნით გამოიხატება. ცალკე მდგომ თანხმოვანს ახლავს ნიშანი, რომელიც ხმოვნის არარსებობას გულისხმობს. თანხმოვანთა თავშეყრის შემთხვევაში გამოიყენება მათი ერთიმეორეზე გადაბმის ტექნიკა.
