ნოდარ ხიზანიშვილი

ნოდარ ხიზანიშვილი

პირადი მონაცემები
სრული სახელი	ნოდარ გიორგის ძე ხიზანიშვილი[1]
დაბადების თარიღი	31 იანვარი, 1953 (1953-01-31) (72 წლის)
დაბადების ადგილი	ბათუმი, საქართველოს სსრ, სსრ კავშირი
სიმაღლე	181 სმ
სათამაშო პოზიცია	მცველი
პროფესიონალური კარიერა*
წლები	გუნდი	მატჩი	(გოლი)
1972–1973	დინამო ბათუმი
1973–1982	დინამო თბილისი	159	(0)
1983	ტორპედო ქუთაისი	6	(0)
ეროვნული ნაკრები
1982	საბჭოთა კავშირი	1	(0)
სამწვრთნელო კარიერა
1993	სამტრედია
1995–1996	სიონი ბოლნისი
* პროფესიონალურ კლუბებში გამოსვლა და გოლები მხოლოდ ეროვნული ლიგებისთვის იანგარიშება

ნოდარ ხიზანიშვილი (დ. 31 იანვარი, 1953, ბათუმი) — ქართველი და საბჭოთა ფეხბურთელი და ფეხბურთის მწვრთნელი. თამაშობდა მცველის პოზიციაზე. იცავდა ბათუმის „დინამოს“, ქუთაისის „ტორპედოს“, თბილისის „დინამოსა“ და საბჭოთა კავშირის ეროვნული ნაკრების ღირსებას. საბჭოთა კავშირის სპორტის დამსახურებული ოსტატი (1981). ღირსების ორდენის კავალერი.

ფეხბურთის თამაში 1969 წელს ბათუმში, მწვრთნელ რ. ბასილაიას ხელმძღვანელობით დაიწყო. თამაშობდა ბათუმის „დინამოში“. 1973 წელს თბილისის „დინამოში“ ჩაირიცხა, რომლის ძირითად შემადგენლობაში დებიუტი ჰქონდა 1973 წლის 19 სექტემბერს. ამ დღეს უეფა-ს თასის გათამაშების ფარგლებში თბილისის „დინამომ“ სოფიის „სლავიას“ უმასპინძლა. შეხვედრა თბილისის „ლოკომოტივის“ სტადიონზე გაიმართა და მას 20 ათასამდე ფეხბურთის გულშემატკივარი დაესწრო. დინამოელებმა თამაში ასეთი შემადგენლობით დაიწყეს: გოგია, ებრალიძე, ჭელიძე, კანთელაძე, ხინჩაგაშვილი, გავაშელი, მ. მაჩაიძე, ასათიანი, გუცაევი, გივი ნოდია და ლევან ნოდია. ნოდარ ხიზანიშვილი მატჩის მეორე ტაიმის 75-ე წუთზე, ვახტანგ ჭელიძის ნაცვლად ჩაერთო თამაშში. შეხვედრა მასპინძელთა გამარჯვებით, ანგარიშით — 4–1 დამთავრდა.^[2][3][4]

რაც შეეხება საკავშირო ჩემპიონატების ფარგლებში გამართულ შეხვედრებს, ამ ტურნირზე პირველად 1975 წლის 7 ივნისს,^[5] საკავშირო ჩემპიონატის მე-10 ტურის კალენდარულ მატჩში, ოდესის „ჩერნომორეცის“ წინააღმდეგ გამოვიდა მინდორზე. შეხვედრა თბილისის „ლოკომოტივის“ სტადიონზე გაიმართა და მას 30 ათასი ფეხბურთის გულშემატკივარი დაესწრო. დინამოელებმა თამაში ასეთი შემადგენლობით დაიწყეს: გოგია, ძოძუაშვილი, ჭელიძე, ებრალიძე, მ. მაჩაიძე, ქორიძე, მუჯირი, გავაშელი, ყიფიანი, ხიზანიშვილი და დარასელია. დაპირისპირება ყიფიანის მიერ შეხვედრის 88-ე წუთზე პენალტით გატანილი გოლის წყალობით მასპინძელთა გამარჯვებით, ანგარიშით — 1–0 დამთავრდა.^[6][7][8]

თბილისის „დინამოს“ მაისურით ბოლოჯერ 1982 წლის 24 ოქტომბერს, საკავშირო ჩემპიონატის 32-ე ტურის კალენდარულ მატჩში, მოსკოვის „სპარტაკის“ წინააღმდეგ ითამაშა. შეხვედრა მოსკოვის ცსკა-ს სამძლეოსნო-საფეხბურთო კომპლექსის ხელოვნურსაფარიან მოედანზე^[9] გაიმართა და მას 5 ათასამდე ფეხბურთის გულშემატკივარი დაესწრო. დინამოელებმა თამაში ასეთი შემადგენლობით დაიწყეს: გაბელია, პაიკიძე, ჩივაძე, ხიზანიშვილი, მუჯირი, ანდღულაძე, სვანაძე, სულაქველიძე, კაკილაშვილი, ცაავა და შენგელია. შეხვედრა სპარტაკელთა გამარჯვებით, ანგარიშით — 4–1 დამთავრდა.^[10]

რაც შეეხება ევროპული საერთაშორისო საფეხბურთო ტურნირების ფარგლებში გამართულ შეხვედრებს, ბოლოჯერ 1982 წლის 29 სექტემბერს, უეფა-ს თასის გათამაშების 1/32 ფინალის განმეორებით მატჩში „ნაპოლის“ წინააღმდეგ დაიცვა თბილისელთა ღირსება. შეხვედრა „სან-პაოლოს“ სტადიონზე გაიმართა და მას 90 ათასი ფეხბურთის გულშემატკივარი დაესწრო. დინამოელებმა თამაში ასეთი შემადგენლობით დაიწყეს: გაბელია, პაიკიძე, ჩივაძე, ხიზანიშვილი, მუჯირი, დარასელია, სვანაძე, სულაქველიძე, კაკილაშვილი, ცაავა და შენგელია. შეხვედრა პაოლო დალ ფიუმეს გატანილი გოლის წყალობით ნეაპოლელთა გამარჯვებით, ანგარიშით — 1–0 დამთავრდა.^[11][12]

ნოდარ ხიზანიშვილმა თბილისის „დინამოს“ შემადგენლობაში უმაღლესი ლიგის საკავშირო ჩემპიონატების 159 მატჩი, ხოლო საკავშირო თასის გათამაშების 18 მატჩი ჩაატარა. ამას გარდა, ევროპული საერთაშორისო საფეხბურთო ტურნირების ფარგლებში „დინამოს“ ღირსება 22 შეხვედრაში დაიცვა, აქედან 19 შეხვედრა — ევროპის თასების მფლობელთა თასის, ხოლო 3 — უეფა-ს თასის გათამაშებაში.

საკლუბო კარიერა 1983 წელს ქუთაისის „ტორპედოში“ დაასრულა, რომლის შემადგენლობაში საკავშირო ჩემპიონატების ექვს, ხოლო საკავშირო თასის გათამაშების ფარგლებში გამართულ სამ შეხვედრაში მიიღო მონაწილეობა.

ერთხელ ითამაშა საბჭოთა კავშირის ეროვნულ ნაკრებში, 1982 წლის 14 აპრილს, ბუენოს-აირესის „ესტადიო მონუმენტალზე“ გამართულ საერთაშორისო ამხანაგურ შეხვედრაში არგენტინის წინააღმდეგ.^[13]

დინამო თბილისი

საბჭოთა კავშირის ჩემპიონატი

• 01  ჩემპიონი: 1978
• 02  ვიცე-ჩემპიონი: 1977
• 03  ბრინჯაოს პრიზიორი: 1976 (გ.), 1976 (შ.), 1981

საბჭოთა კავშირის თასი

• თასის მფლობელი: 1976, 1979
• ფინალისტი: 1980 ^[14]

ევროპის ევროპის თასების მფლობელთა თასი

• თასის მფლობელი: 1981

33 საუკეთესო

• №3: 1981, 1982

ორჯერ იყო დასახელებული საბჭოთა კავშირის წლის 33 საუკეთესო ფეხბურთელის სიაში.^{[15][16][კომ. 1]}

2011 წლის 17 მაისს საქართველოს სპორტისა და ახალგაზრდობის საქმეთა სამინისტროს გადაწყვეტილებით, თბილისის „დინამოს“ მიერ თასების მფლობელთა თასის მოპოვების 30 წლის იუბილესთან დაკავშირებით 1981 წლის თბილისის „დინამოს“ სრულ შემადგენლობასა და სამწვრთნელო შტაბთან ერთად — ნოდარ ხიზანიშვილს საქართველოს სპორტის რაინდის წოდება მიენიჭა.^[17]

მისი შვილი, ზურაბ ხიზანიშვილი, თბილისის „დინამოს“ და საქართველოს ეროვნულ და ასაკობრივ ნაკრებთა ღირსებას იცავდა, ასევე თამაშობდა შოტლანდიის პრემიერლიგის საფეხბურთო კლუბ „გლაზგო რეინჯერსში“, ინგლისის პრემიერლიგის „ბლექბერნ როვერსში“ და სხვა კლუბებში.