Pange lingua

Pange Lingua est initium hymni et orationis a Venantio Fortunato scriptae. Aevo Medio, multi hymni a his verbis creati sunt, praeclarus inter eos Pange Lingua Thomae Aquinatis, cuius ultimae duae strophae saepe ut hymnus separatus, nomine Tantum ergo, canuntur.

Hic hymnus Eucharistiam laudat, et inter festa Diei Cenae Domini et Corporis Domini et inter adorationem eucharisticam canitur.

Etiam compositores protestantes (e.g., Theodoricus Buxtehude) hoc poema in musica ornaverunt.

Textus hymni Pange Lingua (versionis Thomae Aquinatis):

Pange, lingua, gloriosi

Corporis mysterium,

Sanguinisque pretiosi,

quem in mundi pretium

fructus ventris generosi

Rex effudit Gentium.

Nobis datus, nobis natus

ex intacta Virgine,

et in mundo conversatus,

sparso verbi semine,

sui moras incolatus

miro clausit ordine.

In supremae nocte coenae

recumbens cum fratribus

observata lege plene

cibis in legalibus,

cibum turbae duodenae

se dat suis manibus.

Verbum caro, panem verum

verbo carnem efficit:

fitque sanguis Christi merum,

et si sensus deficit,

ad firmandum cor sincerum

sola fides sufficit.

Tantum ergo Sacramentum

veneremur cernui:

et antiquum documentum

novo cedat ritui:

praestet fides supplementum

sensuum defectui.

Genitori, Genitoque

laus et jubilatio,

salus, honor, virtus quoque

sit et benedictio:

procedenti ab utroque

compar sit laudatio.

Nexus externi

• Pange lingua in gregorien.info
• Descriptio hymni Germanice (archidioecesis Monaci)
• Pange Lingua in musica ornatus a Dominico Böhm