Auguste Lumière

Auguste Lumière
Gebuertsnumm	Auguste Marie Louis Nicolas Lumière
Gebuer	19. Oktober 1862 Besançon
Gestuerwen	10. Abrëll 1954 Lyon
Nationalitéit	Frankräich
Aktivitéit	Erfinder, Ingenieur, Biolog, Filmregisseur, Regisseur
Famill
Kanner	Henri Lumière

Den Auguste Marie Louis Nicolas Lumière, gebuer den 19. Oktober 1862 zu Besançon, a gestuerwen den 10. Abrëll 1954 zu Lyon, war e franséischen Erfinder an Entreprener. Mat sengem Brudder Louis huet hien de Cinematograph entwéckelt, en Apparat, deen als Kamera an als Projekter benotzt konnt ginn, an deen de Kino erméiglecht huet. Dem Auguste Lumière säin Haaptintressi louch awer an der biomedezinescher Fuerschung.

No sengem Militärdéngscht huet den Auguste Lumière sengem Papp, dee Fotograf war, gehollef, eng Firma opzebauen, fir Fotoplacken a -pabeier ze produzéieren, d'Société anonyme des plaques et papiers photographiques Antoine Lumière et ses fils, kuerz Société Lumière.

Nom Éischte Weltkrich huet den Auguste Lumière d'Firma verlooss an d'Laboratoires Lumière gegrënnt, e biomedezinesche Fuerschungszentrum a Pharma-Entreprise.

D'Erfindung vum Cinematograph schéngt fir de Lumière éischter niewesächlech gewiescht ze sinn, a senge Memoirë steet erstaunlech wéineg driwwer.

Fir un den Auguste Lumière z'erënneren, huet de Stater Schäfferot de 15. Abrëll 1954 decidéiert um Verluerekascht an der Stad Lëtzebuerg eng Strooss no him ze nennen: d'Rue Auguste Lumière leeft vun der Rue du Laboratoire bis bei d'Rue Lavoisier^[1].

• Auguste Lumière: Mes travaux et mes jours. La Colombe, Paris 1953.

Commons: Auguste Lumière – Biller, Videoen oder Audiodateien