Sylvain Julien Victor Arend

Sylvain Julien Victor Arend
Gebuer	6. August 1902 Robelmont
Gestuerwen	18. Februar 1992
Nationalitéit	Belsch
Aktivitéit	Astronom

De Sylvain Julien Victor Arend, gebuer de 6. August 1902 zu Robelmont bei Virton, Belsch Provënz Lëtzebuerg, a gestuerwen den 18. Februar 1992, war e belschen Astronom, Physiker a Mathematiker.

Hien huet verschidde Koméiten entdeckt, dorënner den hellen C/1956 R1 (Arend-Roland), de periodesche Koméit 49P/Arend-Rigaux an de 50P/Arend.

Doriwwer eraus huet den Arend 51 Asteroiden entdeckt, dorënner den (1127) Mimi, de (1613) Smiley, de (1640) Nemo (no der Figur vum Kapitän Nemo am Roman 20 000 Lieues sous la mer vun Jules Verne), de (1652) Hergé (benannt nom Hergé, dem Auteur vum Tintin), den Amor-Asteroid (1916) Boreas an den Trojaner (1583) Antilochus.

Ausserdeem huet hien 1952 eng Nova am Stärebild Scutum, d'Nova Scuti 1952, entdeckt.

Him selwer ass den Asteroid (1502) Arenda gewidmet. Den Asteroid (1563) Noël ass no sengem Jong, Noël Arend genannt.

Den Arend war 1949 ënner anerem Grënnungsmember vum Comité Belge pour l'Investigation scientifique des Phénomènes réputés paranormaux, dem sougenannte Comité Para.

• In Memoriam Sylvain Arend, de Jean Dommanget (Ciel et Terre, Vol. 108, p. 101)

Portal Astronomie