Constantino la Grande
Constantino la Grande (latina Flavius Valerius Aurelius Constantinus Augustus, elinica Κωνσταντῖνος ὁ Μέγας; 27 febrero s 272 ec – 22 maio 337 ec) ia es un imperor roman de 306 asta 337 ec. El ia es la fio de Flavius Valerius Constantius, un ofisior de la armada roman, e sua sposa Helena. Sua padre ia deveni cesar en la este en 293 ec. Constantino ia es enviada a la este, do ia asende tra la grados per deveni un tribuno su la imperores Diocletiano e Galerio. En 305, Constantino ia asende a la posto de augusto, imperor ueste major, e Constantino ia es clamada a la ueste per batalia en Britan en junta con sua padre. Aclamada como imperor par la armada en Eboracum (York) pos la mori de sua padre en 306 ec, Constantino ia emerji vinsente en un serie de geras interna contra la imperores Maxentio e Licinio per deveni la sola gidor de e ueste e este en 324 ec.
Como imperor, Constantino ia reali reformas governal, finansial, sosial, e militar per forti la impero. Per combata infla, el ia introdui la solido, un moneta oro nova cual ia deveni la model per mones bizantian e european per plu ca un mil anios. La armada roman ia es reorganida per es composada de unias movable de campos e soldata de garisones capas de trata con menasas interna e invades barbar. Constantino ia campania susesosa contra la tribus a la fronteras roman - la francos, la alamanos, la gotos, e la sarmatianes - an recoloni teritorios abandonada par sua presedores en la Crise de Sentenio Tre.
Constantino ia es la imperor roman prima ci ia converti a cristianisme. An si el ia vive la plu de sua vive como un pagan, el ia deveni un cristian sur sua leto de mori, batizada par Eusebio de Nicomedia. El ia ave un rol sinifiante en la Proclama de Milan en 313, cual ia declara tolera de cristianisme en la impero. El ia organiza la Consilio prima de Nicea en 325, cual ia produi la Crede Nisean. La Eglesa de la Tomba Santa ia es construida per sua comanda a la loca suposada de la tomba de Jesus en Jerusalem. La proclama papal de potia tempal en la Eda Medieval ia es fundida sur la Dona de Constantino, un documento falsida.