Zieë van Azov

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

De Zieë van Azov (Oekraïens: Озівське of Азо́вське мо́ре, Ozivs'ke of Azovs'ke more; Russisch: Азо́вское мо́ре, Azovskoje more; Krimtataars: Azaq deñizi) is 'n naevezieë van de Zwarte Zieë, die aan de zuudkant van de res wuuert gescheie door de Straot van Kertsj. De zieë leet ingeklemp tösse Oekraïne en Rusland. Saer 2014 wuuert 't schiereiland de Krim bezat door Rusland en saer invasie in 2022 is de ganse kös in Russische hand.

De zieë haet 'n oppervlakde van zo'n 37.000 km², waat kleiner as Nederland en waat groeëter as d'n Duitsen deilstaat Noordrien-Wesfale. Naamgaever is de stad Azov aan de mónding van d'n Don in Zuud-Rusland, doeënbeej de groeëtere Russische stad Rostov aan d'n Don. De zieë is beheurlik óndeep, mit 8 maeter es gemiddelde en 14 maeter es maximale deepde. 't Zaltgehalte is vaerder rilletief lieëg: ca. 10 à 12 promille midde op zieë en beej de mónding van d'n Don 2 à 4 promille. De baojem is rilletief vlaak en besteit oet zand. 't Guuef gen eilande, maar waal diverse schiereilande en schoorwalle.