തിരുവിതാംകൂർ ഭരിച്ചിരുന്ന ഒരു രാജാവായിരുന്നു വിശാഖം തിരുനാൾ രാമവർമ്മ മഹാരാജാവ്. 1880 മുതൽ 1885 വരെയായിരുന്നു ഇദ്ദേഹത്തിന്റെ ഭരണകാലഘട്ടം. ആയില്യം തിരുനാൾ രാമവർമ്മയുടെ (1860 -1880) ഭരണകാലഘട്ട ശേഷമാണ് വിശാഖം തിരുനാൾ മഹാരാജാവ് അധികാരമേറ്റെടുത്തത്. ആയില്യം തിരുനാളിന്റെ ഇളയ സഹോദരനായിരുന്നു വിശാഖം തിരുനാൾ. രാജ്യത്തിന്റെ തനതായ കാര്യങ്ങൾ ശേഖരിക്കുകയും പ്രദർശിപ്പിക്കുകയും ചെയ്യുന്നതിൽ ഇദ്ദേഹം തല്പരനായിരുന്നു. മരച്ചീനി കൃഷി കേരളത്തിൽ വ്യാപകമായി നടപ്പാക്കിയത് ഇദ്ദേഹമാണ്. ആധുനിക മലയാളസാഹിത്യത്തിനു് നിരവധി സംഭാവനകൾ നൽകിയ ഇദ്ദേഹത്തിന്റെ രചനകൾ ശ്രദ്ധേയങ്ങളായിരുന്നു. കേവലം അഞ്ചു വർഷം മാത്രം ഭരണത്തിലിരുന്ന വിശാഖം തിരുനാൾ 1885 ഓഗസ്റ്റ് 4-ന് അന്തരിച്ചു.
അവലംബം
↑Histrory of Travancore - P. Sankunni Menon. tr. Dr. C. K karim. page 72
↑Travancore Almanac & Directory 1919 Published by the Government of Travancore 1918
