चिकित्साया कानून
| चिकित्साया कानून | |
|---|---|
 चिकित्साया कानूनया फारसी संस्करण इब्न सिनाया समाधिइ (हामादान प्रान्तय्) | |
| Author(s) | इब्न सिना |
| Original title | القانون في الطب |
| Language | अरबी भाषा |
| Genre(s) | चिकित्सा |
चिकित्साया कानून वा चिकित्साया विधि, (अंग्रेजी भासय् The Canon of Medicine द क्यानन अफ मेडिसिन, अरबी भासय्: القانون في الطب अल कानून फि अलतिबि; फारसी भासय्: قانون در طب कानून दर तेब; लातिन भासय्: Canon Medicinae क्यानन मेडिसिने) न्यापु सफूलि मुंकातःगु छगू चिकित्साया हलिंसफू ख। थ्व हलिं सफू फारसी मुस्मां चिकित्सक-दार्शनिक इब्न सिना( ابن سینا)जुं मुंकादिगु ख व १०२५स पूवंगु ख। थ्व च्वखँ थःगु ईया दकलय् प्रभावशाली च्व-ज्याय् ला। थुकिलि इस्लामिक हलिंया समकालीन चिकित्सा ज्ञानया अवलोकन न्ह्यब्वयातःगु दु। अबिलेया इस्लामिक चिकित्सा ग्रीक-रोमन चिकित्सा (विशेष यानाः ग्यालेन), फारसी चिकित्सा, चिनियाँ चिकित्सा व भारतीय चिकित्साया परम्परां प्रभावं बुयावःगु ख। १२गु शताब्दीइ थ्व सफूया अरबीं लातिन भासय् भाय्हिला जुइधुंका थ्व हलिंसफूलिं मध्यकालीन चिकित्साया विकासय् यक्व प्रभाव लाकल। प्रारम्भिक आधुनिक कालया युरोपया विश्वविद्यालयय् थ्व हे सफूयात मू ग्रन्थ वा मानक पाठ्यसफूया कथं प्रचलन जुल।
नां
थ्व सफूया अंग्रेजी नां क्यानन अफ मेडिसिन सामान्य मध्यकालीन ल्यातिन भासाया क्यानन मेडिसिनें वःगु ख। ल्यातिन भासाया खँग्वः धाःसा मूल अरबी القانون في الطب ( अल कानून फि अलतिबि)या भाय्हिला ख। "क्यानन" खँग्वःयात प्रायः अंग्रेजी भासं "कानून" वा "कानूनी संहिता"या रुपय् अनुवाद यानातःगु दु। थन धाःसा थ्व खँग्वःया अर्थ छगू क्रमबद्ध प्रणाली, वा पूर्ण, सार्वभौमिक हलिंसफू ख। थ्व सफूया सामान्य मध्यकालीन नां लिबर क्यानोनिस (Liber Canonis) ख।
ब्वथला
थ्व हलिंसफूयात न्यागु सफुतिइ बायातःगु दु
- आधारभूत चिकित्सा व शारीरिक सिद्धान्त, एनाटोमी, रेजिमेन व सामान्य चिकित्सीय पद्धतितेगु च्वखँ।
- चिकित्साय् छ्यलीगु पदार्थतेगु धलः, आखःग्वःकथं झ्वलं दयेकातःगु धलः व थन्याःगु पदार्थतेगु सामान्य गुणया च्वसु।
- म्हया छगू ब्वय् विशेष ल्वय् तेगु निदान व उपचार
- म्हया यक्व ब्व बाय् मुक्कं म्हयात असर याइगु अवस्थाया निदान व उपचार।
- फर्मुलरी वा यौगिक उपायया सूत्र।
सफू १, ३, व ४ प्रत्येकयात थीथी भाग (फन्न) , अध्याय (त'लिम), उपअध्याय (जुम), खण्ड (फस्ल), व उपखण्ड (बाब)य् ब्वथलातःगु दु।