Aino

Denne artikkelen handlar om namnet. For folkegruppa, sjå ainoar. For språket, sjå ainospråk.

Aino er eit finsk kvinnenamn, og tidlegare mannsnamn, danna av ordet ainoa, 'einaste'. Aina er ein variant av namnet. Aino har svensk namnedag den 13. juni.

Namnet er brukt i det finske eposet Kalevala, der Aino er den vakre systera til Joukahainen som druknar seg for ikkje å måtte gifta seg med den gamle Väinämöinen.

Under den finske nasjonalromantiske perioden sist på 1800-talet var namnet mykje brukt. Nokre av dei første som fekk det var Aino Järnefelt (gift Sibelius), fødd i 1871, og Aino Krohn (seinare Aino Kallas), fødd i 1878. Etter ein topp i 1917, då over 1200 jenter fekk namnet Aino, sokk bruken utover 1900-talet. Mot slutten av 1990-åra voks han igjen, og i 2006 var Aino blitt jentenamnet som var mest gjeve i landet.^[1]

Namnet er mykje brukt i Finland, der 2 % av kvinner heiter Aino (2008). Det er også ein del brukt i Estland (0,8 % i 2004). I Noreg var det 156 kvinner som heitte Aino i 2008.

• Aino Ackté (1876-1944), finsk sopran
• Aino Kallas (1878–1956), finsk-estisk forfattar
• Aino Aalto (1894–1949), finsk arkitekt og formgjevar
• Aino Hivand (f. 1947), samisk biletkunstnar
• Aino Kannisto (f. 1973), finsk fotokunstnar
• Aino-Kaisa Saarinen (f. 1979), finsk langrennsløpar
• Aino Jensen, dansk-norsk glasskunstnar

• Søk etter norsk namnestatistikk for Aino hjå Statistisk Sentralbyrå