Granodioritt

Granodioritt
Grandioritt frå Massif Central i Frankrike
Kjenneteikn
Gruppe	Djupbergart
Hovudmineral	kvarts, plagioklas

Granodioritt er ein magmatisk djupbergart som hovudsakleg består av kvarts og feltspat, med meir plagioklas enn kalifeltspat. Anortittinnhaldet i plagioklasen skal vere mindre enn 50 prosent, elles vert bergarten kalla granogabbro. Dei mørke minerala er ofte biotitt og hornblende, og han er som regel mørkare enn vanleg granitt.

Bergarten er ganske utbreidd i fjellkjedestrøk (til dømes oppdalitt i Den kaledonske fjellkjeda i Noreg).

I snitt har den øvre kontinentalskorpa den same samansettinga som grandioritt. Grandioritt er ein djupbergart som er danna av ein intrusjon av kvartsrik magma, som vert avkjølt i batolittar eller stokkar under jordoverflata. Han kjem vanlegvis berre til overflata etter løfting og erosjon. Den tilsvarande lavabergarten vert kalla dacitt.

Rosettasteinen vart laga av granodioritt, og Plymouth Rock var ei flyttblokk av granodioritt.

Namnet kjem frå to tilknytte bergartar, granitt og dioritt. Grano-rota kjem frå latin og tyder «korn».

«granodioritt» i Store norske leksikon, snl.no.