Expedicion de Sicília
L'Expedicion de Sicília foguèt una operacion militara atenenca que se debanèt en Sicília de 415 a 413 av. JC dins lo corrent de la Guèrra de Peloponès. Son objectiu èra la conquista de Siracusa, ciutat-estat grèga pus poderosa de l'illa, que se preparèt lentament au combat. Ansin, leis Atenencs poguèron desbarcar sensa dificultat e començar lo sètge de la vila. Pasmens, de renfòrç espartencs permetèron de renfòrçar lei defensors puei de menar de còntra-ofensivas. En despiech de l'arribada d'una segonda flòta, leis Atenencs deguèron abandonar lo sètge e sa retirada s'acabèt per un desastre ambé la capitulacion ò la destruccion de tota l'expedicion.
Per Atenas, la desfacha foguèt una catastròfa car la ciutat perdiguèt aperaquí 200 naviris e 50 000 òmes, compres 12 000 ciutadans atenencs. Aquò entraïnèt lo reversament de la democracia atenenca en 411 av. JC e d'insureccions au sen de la Liga de Delos. Donèt tanben un avantatge decisiu a Esparta que ganhèt finalament la Guèrra de Peloponès en 404 av. JC.