Serotipo

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
Dos serotipo 1a y 1b cu antigeno 2a y 2b riba superfisie, cu ta wordo reconoci pa dos anticurpa distincto, 3a y 3b, respectivamente

Un serotipo ta referi na un variacion distincto denter di un especie di bacteria, virus of celnan di inmunidad cu ta wordo haya den diferente individuo. E microorganismo, virus of celnan aki ta wordo agrupa huntu a base di nan similaridad reactivo entre antigenonan superficial y un antiserum specifico. Esaki ta permiti pa clasificacion na un nivel bou di e especie. Un coleccion di serotipo cu antigenonan comun ta conoci como un serogrupo of, de bes en cuando, un serocompleho.

Serotipifica ta importante pa identifica especie y subespecie. Por ehempel, tin mas cu 2.600 serotipo di bacteria di genero, Salmonella. E bacteria Vibrio cholerae, cu ta causa colera, tin mas cu 200 serotipo basa riba su antigenonan. Sinembargo, solamente dos serotipo, O1 y O139, ta produci e veneno organico cu ta causa colera.

E idea di serotiponan a wordo descubri na 1933 door di Rebecca Lancefield, un microbiologo Mericano, mientras e tabata studia streptococcus.