Wikipedian in Residence
| Supkategoria di | Wikimedian, media professional  |
|---|---|
| Field of this occupation | Wikimedia movement |
| Foundational text | Wikipedian-in-residence, a proposal |
| Fecha inisial | 2006 |
| Wèpsait ofisial | https://meta.wikimedia.org/wiki/Wikimedian_in_residence |
| Maintained by | Wikimedians in Residence Exchange Network |
Un Wikipedian in Residence (WiR) ta un editor di Wikipedia cu a acepta e encargo di un institucion publico, usualmente un museo, biblioteka of archivo (abrevia GLAM pa Galleries, Libraries, Archives, Museums) pa duna sosten na e organisacion den colaboracion cu Wikipedia. E encargo aki por ta sea un empleo fulltime o parttime y ta normalmente pa un periodo fiho.
Contrayendo un WiR ta ofrece institutonan cultural e oportunidad pa duna e publico mas bista riba nan coleccion. E material ta wordo mucho mas mira cu si e tabata simplemente warda den e archivo of riba website di e instituto, ya cu Wikipedia ta un di e top 10 website mas bishita na mundo. A traves di agrega conocemento contextual na obhetonan di un coleccion y di inclui esakinan den articulonan di Wikipedia, e coleccion ta bira mas visibel y accesibel y ta haña un contexto mas cla y un relevancia social mas grandi door di su uzo den un contexto actual.
Na 2010, Liam Wyatt di Australia a bira e prome Wikipedian in Residence, ora el a traha como boluntario na Museo Britanico pa un periodo di cinco siman. Den añanan recien, institucionnan cu un Wikipedian in Residence tabata na Reino Uni: Biblioteka Britániko, Museo y Galeria di Arte di Derby, Galeria di Arte Nobo Walsall; na Francia: Palacio di Versailles; na Spaña: Museo Picasso, na Merca: Instituto Smithsonian, Biblioteca Presidencial di Gerald R. Ford, Administracion Nacional di Archivo y Registro, y na Suisa: Schweizerisches Bundesarchiv.
Tarea
E tareanan cu un WiR por tin ta inclui:
- provee informacion na e organisacion GLAM tocante Wikipedia, Wikimedia Commons, Wikidata y otro proyectonan ruman, licencia gratis y maneranan den cua material den su coleccion por wordo comparti cu Wikipedia;
- duna sosten den skirbimento y suplementacion di articulonan di Wikipedia den e area tematico di e institucion;
- yuda den lansamento di material digital bou di licencia gratis riba, por ehempel, Wikimedia Commons;
- yuda den organisa actividadnan publico di e institucion na beneficio di Wikipedia y su proyectonan ruman
- provee editornan boluntario di Wikipedia cu e oportunidad pa haci pregunta na e organisacion.
Den practica esaki ta involvi organisacion di un variedad di actividad manera reunion di skirbimento (e.o. pa amplia e cantidad of pa mehora e calidad di e articulonan di Wikipedia), competencia di skirbimento of fotografia riba Wikipedia riba temanan relevante pa e organisacion; mehora acceso na archivonan digital y fungi como intermediario entre editornan individual riba Wikipedia y e institucion tocante topiconan specifico.
Reino Hulandes
E prome WiR na Hulanda, Hay Kranen (usuario:Husky), a wordo nombra na 2013 door di e Biblioteka Real y e Archivo Nacional na Den Haag.[1]
Na e Centro di Estudionan Africano di Universidad di Leiden, Hans Muller (usuario:Hansmuller) a bira e di dos WiR Hulandes, kende hunto cu un di tres WiR a bishita un total di diesdos biblioteca special na Hulanda.[2][3]
Fin di 2024, a nombra Ginelly Quandt, asisti pa Ricardo Arends, como WiR na Aruba, e prome den region di Caribe.[4] Esaki a tuma luga den cuadro di e proyecto di dos aña “Wikipedia on Aruba | Aruba on Wikipedia”, un iniciativa di Wikimedia Nederland den cooperacion cu Biblioteca Nacional Aruba (BNA), Archivo Nacional Aruba (ANA), Monumentenfonds Aruba (SMFA) y UNOCA, y cu ta wordo financia pa e organisacion Hulandes, Fonds voor Cultuurparticipatie.