Hypotheses non fingo

Dialegd: Schbaimarisch
S'persenlische Exembla vunde erschde Ausgab vunde Principia ausm Johr 1687 mid aischehendische Omergunge fa die zwedd Ausgab, uffb'waad inde Cambridge University Library

Hypotheses non fingo (ladainisch Hypothese erdeng'g isch nedd) ischn b'riehmde Sadz vum Isaac Newton. Die Feschschdellung isch in soina Allgemeinen Anmerkung, dem General Scholium, endhalde, wude zwedde Ausgab vun 1713 vunde Principia zugfischd worre isch. De Isaac Newton hodd kä Hypothese iwwa die Grind warum sisch Masse oziejen uffschdelle wolle.

„Hactenus Phænomena cælorum & maris nostri per Vim gravitatis exposui, sed causam Gravitatis nondum assignavi.“

„Isch hab bisher die Erschoinunge vude Himmelskerwa unn die Beweschunge vum Meer dursch die Krafd vunde Schwere erglerd, awwa isch hab nirschens die Ursache vum ledschdere ogewwe.“

– Isaac Newton[1][2]

Waida sachda donn, wass als Hypothes vaschdeje dud:

„Quicquid enim ex Phænomenis non deducitur, Hypothesis vocanda est; & Hypotheses seu Metaphysicæ, seu Physicæ, seu Qualitatum occultarum, seu Mechanicæ, in Philosophia Experimentali locum non habent. In hac Philosophia Propositiones deducuntur ex Phænomenis, & redduntur generales per Inductionem. Sic impenetrabilitas, mobilitas, & impetus corporum & leges motuum & gravitatis innotuerunt. Et satis est quod Gravitas revera existat, & agat secundum leges a nobis expositas, & ad corporum cælestium & maris nostri motus omnes sufficiat.“

„Alles nämlisch, was nedd ausde Erschoinunge folschd, isch ä Hypothes unn Hypothese, saijense metaphysisch odda physisch, meschonisch odda diejenische vunde vaborgene Aischeschafde, dirfen nedd in die Experimentalphysik uffgnumme werre. In diesa laided ma die Sedz ausde Erschoinunge ab unn va'allg'moinadse dursch Induktion. Uff die Aad unn Wais hawwen ma die Udurschdringlischkaid, die Be'eschlischkaid, de Schdoss vunde Kerwa, die G'sedz vunde B'weschung unnde Schwere kenne g'lernd. S'g'nischd, dasses die Schwere gibd, dases noch denne vun uns dag'leschde G'sedze wirg'gen, unn dassse alle B'weschunge vunde Himmelskerwa unn vum Meer erglere kennen.“

– Isaac Newton[1][2]

Awwa nochm haidische Vaschdendniss isch die vum Newton erwähnde Induktion kä Meschlischkaid um Theorije zu endwiggle. De Karl Popper unde David Miller hawwen b'wiese, dass induktive Wahschoinlischkaid nedd fungdzionierd[3] unn domid a die Ideje vum Rudolf Carnap unn onnare, wu dodro gschafd kabd hawwen. Do'd'vor hodd nochm haidische Vaschdendniss vum B'griff vunna Hypothes de Newton erschdmmol ä Hypothes driwwa uffgeschdelld kabd, dass unn noch welche Gsedzmessischkaide, alla wie sisch Masse oziejen.[4] Die mathematisch formulierde Gsedz sinn donn bschdedischd worre unn domid die Hypothes zur Theorie iwwa die Grawitazijon worre. De Wisseschafdsphilosoph William Whewell hodd zu Hypothese gsachd:

„What is requisite is, that the hypotheses should be close to the facts, and not connected with them by other arbitrary and untried facts; and that the philosopher should be ready to resign it as soon as the facts refuse to confirm it.“

„S'isch erfordalisch, dass Hypothese noh onde Tatsache lischen unn nedd dursch onnare willkirlische unn ugbriefde Tatsache midden vabunne sinn; unn dass de Philosoph b'raid isch, se uffzugewe, sobald die Tatsache se nedd bschdeischen.“

– William Whewell[5]

Die Froch warum sisch Masse oziejen, werd nedd b'hondeld unn isch fade Newton, wie a schbeda fade Albert Einstein kä Frochschdellung.

Wisseschafd

Haidzudach hodds Wisseschafdla, wu g'mees de Hypotheses non fingo z. B. die Kopenhagener Daidung unn onare Indabredadzijone vunde Quondemeschonig als unedische Hypothese, wumidma vasuchd ä Vaschdeniss zu krische, wu iwwa die mathemadische Bschraiwung vunde Schrödingerglaischung naus gehd. De Pionier vunde Laserspektroskopie unn Nobelpraisträscha Theodor Hänsch hodd innem Interview do'd'zu gsachd:

„Ich bin ein Experimentalphysiker, und ich betrachte die Gesetze der Quantenmechanik naiv, als Rechenregeln sozusagen, die empirisch bestätigt sind und mit denen wir auch ungeheuer genaue Vorhersagen machen können.“

„Isch binen Experimentalphysiga, unn isch gugg naiv uff die G'sedz vunde Quondemeschonig, als Reschereschle sozusache, wu empirisch bschdedischd sinn unm midd dene ma a ugeheija g'nauwe Vorhersache mache kennen. vum ledschdere ogewwe.“

– Theodor Hänsch[6]

Vawais

  1. ↑ 1,0 1,1 The General Scholium to Isaac Newton’s Principia, 2nd ed. (1713).
  2. ↑ 2,0 2,1  Sir Isaac Newton's Mathematische Principien der Naturlehre: Mit Bemerkungen und Erläuterungen herausgegeben von Prof. Dr. J. Ph. Wolfers. Oppenheim, Berlin 1872, S. 511.
  3. ↑ Karl Popper, David Miller, A proof of the impossibility of inductive propability, Nature 392, 1983, Seite 687-688
  4. ↑ Areins Pelayo, Understanding Hypotheses in Newton’s Scientific Thought, PhD, University of Illinois Chicago 2022
  5. ↑  William Whewell: The Philosophy of the Inductive Sciences. London, 1840, S. 438 (bai archive.org).
  6. ↑ Interview mit Physik-Nobelpreisträger Prof. Dr. Theodor W. Hänsch. Abgerufen am 1. Februar 2025.