Русске царство

Русске царство Русское царство ←  1547 – 1721  → застава герб
География Територия Русского царства: 1500 темнозелена; 1600 зелена; 1700 свѣтлозелена
Главный город	Москва (1547–1712) Санкт-Петербург (1712–1721)
Обывательство
Число	конець XVI. ст. — 6 млн 1640-ы — 7 млн 1670-ы — 11 млн 1722 — 14 млн
Державна организация
Форма влады	монархия
Предходникы: Велике княжество Московске Наступникы: Российска империя

Ру́сске ца́рство — назва российской державы меджи роками 1547 и 1721.^[1]

Взник и вывой

Московскый пановник в року 1547, великый князь московскый Иван IV. Грозный быв помазаный на царство и прияв титулу русс. великий государь, Божиею милостию царь и великий князь всея Руси, Владимирский, Московский, Новгородский, Псковский, Рязанский, Тверской, Югорский, Пермский, Вятцкий, Болгарский и иных, в далшых роках росширену: царь Казанский, царь Астраханский, царь Сибирский, и всея Северныя страны повелитель. Иншы хоснованы назвы царства были в России: Московское царство, Московское государство; в Западной Европѣ: Moscovia або Russia. Меджинародне вызнаня царской титулы пришло не нараз, але росло въедно з успѣхами росширѣня царства. В року 1552 было прилучене Казанске ханство, в року 1556 — Астраханске, так цѣлый базен Волгы припав царству, в року 1558 зачала ся война за Побалтя, на выходѣ ся зачало освоѣня Уралу и Сибирии. Зоз тыма росширѣнями моноетнична Русь перетворила ся на полиетничну Россию. В року 1554 пришло вызнаня од Англицкого кральовства, в року 1574 — од Священной римской империи. Але росширѣня на запад ся не подарило, а од югу наростало протистояня Османской империи.^[1]

Послѣдный царь Русского царства, Петро I., завойовав приступ ку Азовскому морю (1695–1696), а пак ся сконцентровав на добытю приступа ку Балтицкому во войнѣ зоз Швециев. Выграна Сѣверна война 1700–1721 вывела царство в число ведучых европскых великодержав.^[1]

Хронология

• 1547 — Иван IV. Грозный ставать ся первым русскым царьом^[2]
• 1554 – 1560 — в Москвѣ на вызнаменаня покорѣня Казанского ханства выставили храм Василия Блаженного^[3]
• 1556 — Иван IV. Грозный добывать Астраханске ханство^[4]
• 1582 — козак Ермак Тимофѣевич розбивать войско сибирского хана при рѣцѣ Иртыш^[5]
• 1584 — смерть Ивана Грозного, його сын Федор, формалный царь, слабоумный, практично царство справуе його шовгор Борис Годунов^[6]
• 1598 – 1605 — царюе Борис Годунов,^[7] по його смерти зачинать ся «баламутна доба» царства^[8]
• 1613 — конець «баламутной добы»; царьом выбраный Михаил I. Романов, первый царь династии, котра зостане на тронѣ до року 1917^[9]
• 1666 — патриарх Никон выголошуе старовѣрцьох, котры одпорують заведжѣню богослужебных реформ, за розбивачох^[10]
• 1670 — бунт Степана Разина^[11]
• 1709 — Петро I. розбивать шведске войско под Полтавов; Швеция утрачуе контролу над Балтицкым морьом.^[12]
• 1712 — царь Петро I. переносить столицю царства до Санкт-Петербурга^[13]
• 1721 — Ништадтскый мирный договор, завершуючый Сѣверну войну, оддавать Ингрию, часть Карелии, Ливонию и Финландию русскому царству, котре ся ставать европсков великодержавов; Петро Великый бере титулу императора^[14]

Жерела и одказы

• Галушко К.Ю.. РОСІЯ. //Енциклопедія історії України : у 10 т. / Смолій В. и др. (ред.). Інститут історії України НАНУ. — К. : Наук. думка, 2003-2013. ISBN 966-00-0632-2; том 9; сс. 311–317. http://resource.history.org.ua/cgi-bin/eiu/history.exe?&I21DBN=EIU&P21DBN=EIU&S21STN=1&S21REF=10&S21FMT=eiu_all&C21COM=S&S21CNR=20&S21P01=0&S21P02=0&S21P03=TRN=&S21COLORTERMS=0&S21STR=Rosiia. [перевірено 2020-12-17]. укр.
• Хронология //Всемирная история в датах и событиях. Москва: ОАО Изд-во «Радуга», 2002 ISBN 5-05-005005-7 — Chronologie universelle/ Paris: Larousse, 1997 ISBN 03-521229-0 русс.

русс.

Референции