Lagomorpha

Sta pàggina è scritta sicutannu i règuli dû Ducumentu pi l'Ortugrafìa dû Sicilianu dâ Cademia Siciliana.

? Lagomorpha
Classificazzioni scintìfica
Regnu: Animalia Filu: Chordata Classi: Mammalia Òrdini: Lagomorpha Bowdich, 1821

Li Lagomorpha (BRANDT, 1855) sunnu n'òrdini dî Mammìfiri, ca àvi du' famigghi viventi: Leporidae (lepri e cunigghia) e Ochotonidae (pica).

Lu nomu di l'òrdini veni dî palori grechi lagos (λαγος), "lepru", e morphē (μορφή), "furma".

Nzinu ê primi dû vintèsimu sèculu, li lagumorfi vinìanu cunzidirati na suprafamigghia nta l'òrdini dî Rodentia . Certu, a na prima taliata, na simigghianza cc'è tutta, ma ntô stissu tempu cci sunnu diffirenzi abbastanza mpurtanti:

• Li lagomorfi ànnu quattru palitti supraniuri, mmeci di dui comu ntê Rodentia;
• Li lagomorfi ànnu na dieta tutta erbìvura, puru si nta certi casi l'armali dî geniri Lepus e Ochotona ànnu statu visti nutricàrisi di nzetti ntô mmernu;
• Lu scrotu, ntê lagomorfi, s'attrova davanti ô peni, chiuttostu ca arrè, comu ntê Rodentia: sparti, ci manca lu baculum o ossu dû peni.

Sti diffirenzi purtaru li studiusi a classificari li Lagomorfi e li Rodentia nta du' ordini diversi, junciuti nta lu clade Glires sicutannu li studi filuginètici .