Teikovo

Teikovo
Тейково

Lidnanznam	Flag
Valdkund	Venäma
Eläjiden lugu (2021)	31,305 ristitud
Pind	26,8 km²
Pämez'	Svetlana Semenova (reduku 2019—)
Telefonkod	+7−49 343-xx-xxx
Avtokod	37
Aigvö	UTC+3 (MSK+0)

Teikovo (ven.: Те́йково) om Venäman lidn da lidnümbrik Ivanovon agjan päivlaskmas. Se om agjan kudenz' lidn eläjiden lugun mödhe, Teikovon rajonan administrativine keskuz (ei mülü sihe).

Eländpunkt mainitaškanzihe kuti Teikovo-žilo (ven.: село Тейково) manmehiden vasthalibundoiden tagut 17. voz'sadan augotišes. Ezmäižen kangazfabrikan aluz oli pandud Teikovoho vl 1787. Žilo sai lidnan statusad vn 1918 6. päiväl sügüz'kud. Raketsodavägiden 54. divizii baziruiše sodalidnudes vspäi 1961.

Teikovo šingotase bumagkanghiden kombinatal^[1], omblendtegimištol, sauvondmaterialiden pästandal (fanerankombinat, sendvičpaneliden tehmine, geokanghan edheotand), mugažo mašinansauvomižen tegim radab (aviapalad, poltuzpompad) i kombisötken tegim om saudud.

Lidn sijadase Väz'm-jogen randoil (ven.: Вя́зьма 86 km pitte, Kläz'man hurapol'ne bassein), 125 m ü.m.t. keskmäižel korktusel.

Matkad Ivanovon röunhasai om 25 km pohjoižpäivnouzmha orhal, 29 km avtotel vai raudtel. Toižed lähembaižed lidnad oma Kohm 35 km päivnouzmha-pohjoižpäivnouzmha orhal, 45 km avtotedme vai raudtedme, i Komsomol'sk 22 km pohjoižhe-lodeheze orhal vai 31 km avtotedme. Teikovo-raudtestancii radab lidnan päivnouzmaižel röunal vspäi 1896.

Teikovo om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez', edel vn 2015 sügüz'kud oli Duman ezimez'. Edeližed lidnümbrikon pämehed oma Sergei Ribakov (Сергей Рыбаков, reduku 2017 — reduku 2019), Aleksei Jastrebov (kezaku 2016 — heinku 2017). Lidnan Duman ezimez' om Natal'ja Koroleva (Kovaleva) vn 2020 redukuspäi.

Vl 1939 lidnan ristitišt oli 30 294 eläjad. Vn 2010 Venäman rahvahanlugemižen mödhe lidnan eläjiden lugu oli 34 976 ristitud, vn 2021 — 31 305 ristitud. Kaik 32 791 eläjad oli lidnas vl 2017. Kaikiš suremb lidnan ristitišt oli 41 607 rist. vl 1970 i 38..39 tuhad eläjid vozil 1989−2001.

Rahvahad (2010): venälaižed — 94,3 %, ukrainalaižed — 1,9 %, toižed rahvahad — 3,8 %.

Rahvahad (enamba 0,4 % vl 2021): venälaižed — 92,5 %, ukrainalaižed — 0,7 %, armenijalaižed — 0,6 %, azerbaidžanlaižed — 0,6 %, totarlaižed — 0,5 %, toižed rahvahad — 3,2 %, rahvahuden ozutandata — 1,9 %.

Ortodoksižen hristanuskondan kuz' pühäpertid^[2] oma kaičenus i saudud lidnas: ph. Mikulai-čudonsädajan päjumalanpert' (1795−1833), koume jumalanpertid i kaks' časounäd.

Lapsiden opendusen aluzkundad oma kaks'toštkümne päivkodid (nomer 1..10, 14, 15), nell' keskškolad (nomer 1, 2, 4, 10), gimnazii nomer 3, avoin (aterjoiden) škol nomer 5, Teikovon korrekcine škol-internat, lapsiden da norišton sädamižen šingotesen keskuz, muzikškol, lapsiden da norišton sportškol. Teikovon industrialine kolledž^[3] i Teikovon äiprofil'ne kolledž^[4] oma lidnan professionaližen opendusen aluzkundoikš.

• 
  Kul'turkeskuz Leninan nimed ühtennimižel torgul (2010)
• 
  Ph. Mikulai-čudonsädajan päjumalanpert' (huralpäi) i ph. Illä-endustajan jumalanpert', vn 2018 nägu
• 
  Teikovon bumagkanghiden kombinat vl 2018
• 
  Kombisötken tegim vl 2010
• 
  Teikovo-päraudtestancii vl 2007

1. ↑ Teikovon bumagkanghiden kombinatan sait (teikovo.com). (ven.)
2. ↑ Teikovon pühäpertid sobory.ru-saital. (ven.)
3. ↑ Teikovon industrialižen kolledžan sait (pl-24.ru). (ven.)
4. ↑ Teikovon äiprofil'žen kolledžan sait (npu19.ru). (ven.)

• Lidnümbrikon Administracijan i Duman sait (городтейково.рф). (ven.) (angl.) (saks.) (fr.) (ital.)
• Teikovo-lidnan istorijan muzejan sait (музей-тейково.рф). (ven.)

Teikovo Vikiaitas