Diorama
'n Diorama of kykkas is 'n deels driedimensionele uitstalling waar voorwerpe sodanig opgestel is dat dit die indruk van 'n moontlike werklike toneel skep. Diorama's word algemeen in museums en ander uitstalruimtes gebruik. Die uitstalling kan volgrootte voorwerpe of miniatuurweergawes daarvan bevat. Dit word gewoonlik belig en vir beskerming in glaskaste geplaas.
Die word "diorama" in 1823 ontstaan as 'n toestel om foto's mee te kyk. Die woord beteken letterlik "deur dit wat gesien word", van Grieks di- = "deur" + orama = "wat gesien word, 'n gesig". Die diorama is deur die Franse Daguerre en Charles Marie Bouton ontwerp. Dit is vir die eerste keer op 29 September 1823 in Londen tentoongestel.[1]
Die oorspronklike diorama het uit 'n stuk materiaal bestaan wat aan beide kante geverf was. Wanneer dit van die voorkant verlig was, sou dit een fase van die toneel wys, en deur dit van agter te verlig, sou 'n ander fase of aspek sigbaar wees. So kon 'n toneel in sonlig na maanlig verander, 'n bewegende trein op 'n spoor kon bots, of 'n toneel voor en na 'n aardbewing kon vertoon word.
Een van die eerste moderne gebruike van diorama's was in Stockholm, Swede, met die opening van die Biologiese Museum in 1893. Die museum het oor verskeie diorama's beskik wat oor drie vloere gestrek het.
Verwysings
- ↑ Diorama - Word Origin & History – Online Etymology Dictionary – Dictionary.com. Besoek op 1 November 2011.
Eksterne skakels
Wikimedia Commons het meer media in die kategorie Diorama.
