Visarend

Visarend
Visarend wat pas 'n vis gevang het.
Wetenskaplike klassifikasie
Domein:
Eukaryota
Koninkryk:
Animalia
Filum:
Chordata
Klas:
Aves
Orde:
Falconiformes
Familie:
Accipitridae
Genus:
Haliaeetus
Spesie:
H. vocifer
Binomiale naam
Haliaeetus vocifer
(Daudin, 1800)
     standvoël       nie-broeiende besoeker

Die visarend of witkop[2] (Haliaeetus vocifer) is 'n groot en bekende roofvoël met 'n treffende wit, kastaiingbruin en swart verekleed. Benewens hul sierlike en kragtige voorkoms, is hulle ewe bekend om hul stem. Die uitbundige, klinkende roep, wat baie vrylik van wagposte of tydens vlug geuiter word,[2] is deel van hul territoriale sowel as paringsgedrag.[3] Hul groot neste word in bome reg langs die waterkant geplaas, en word jaar op jaar herbenut. Dit is die enigste van die visvretende arende in Afrika, waar dit baie wydverspreid voorkom. Dit is die nasionale voël van lande soos Namibië, Malawi, Zambië, Suid-Soedan en Zimbabwe. Die visarend mag wel op die Amerikaanse arend lyk, maar alhoewel hulle verwant is, is hulle tot verskillende kontinente beperk, waar hulle by verskillende habitatte aangepas is.

Identifikasie

Dit het 'n opvallende spierwit kop en bors met bruin pens en vlerkdekvere. Hierdie arend het swart en bruin ondervlerke en 'n wit stert. Behalwe vir die kenmerkende roep, is die volwasse visarend bekend vir sy uitkenbare kleure soos pas genoem. Volwasse voëls word 63 tot 73 cm lank van snawel- tot stertpunt. Soos dit by roofvoëls die reël is, word die wyfie effens groter as die mannetjie. Anders as die volwassenes het jongvoëls aanvanklik donker koppe. Hulle is ook bruin geveerd aan die bokant, en baie gestreep oor die borskant.[2]

Verspreiding

Die visarend is 'n algemene standvoël in Afrika suid van die Sahara, insluitende die oorgrote deel van Suid-Afrika. In die Wes-Kaap het dit etlike jare te Zeekoevlei gebroei.[2]

Habitat

Groot riviere, riviermondings met oewerbome,[2] damme en mere en ook aan kusgebiede.

Gewoontes

Hulle voed op vis wat van die wateroppervlak af gegryp word, maar hulle sal ook vis by ander voëls roof.[2] Hulle hou ook daarvan om paddas te vang.[2]

Roep

'n Kenmerkende lang "kyeow-kou-kou"-roep.

Broeigedrag

Hul groot neste word in bome reg op die waterkant geplaas, en word jaar op jaar herbenut.[2] Twee spierwit eiers word gelê.

Nasionale embleem

Die visarend is een van Namibië se wapendiere, asook Suid-Soedan en Zambië se wapendier. Beide die nasionale krieketspan en nasionale rugbyspan van Namibië vertoon dié wapendier in hul embleme en die Namibiese nasionale krieketspan se bynaam "Arende" is aan die visarend ontleen.

Ander name

Weens die spesie se wye verspreiding het dit volksname in baie tale.[4] Voorbeelde van name in ander tale is: nkwazi in Chewa, African fish eagle in Engels, aigle pêcheur in Frans,[5] ntšhu in Noord-Sotho, hungwe in Shona en inkwazi in Zoeloe.

Fotogalery

  • Eier van 'n visarend.
    Eier van 'n visarend.
  • 'n Visarend in vlug.
    'n Visarend in vlug.
  • Kop van 'n visarend, wat sy uiters goeie sig aandui.
    Kop van 'n visarend, wat sy uiters goeie sig aandui.
  • 'n Driejarige visarend in Tanzanië.
    'n Driejarige visarend in Tanzanië.
  • Visarend vreet 'n vis in die Nasionale Chobewildtuin, Botswana.
    Visarend vreet 'n vis in die Nasionale Chobewildtuin, Botswana.

Sien ook

Verwysings

  1. ↑ (en) "Haliaeetus vocifer". IUBN-rooilys van Bedreigde Spesies. Weergawe 2013.2. Internasionale Unie vir die Bewaring van die Natuur. 2013. Besoek op 26 November 2013. {cite web}: Ongeldige |ref=harv (hulp)
  2. ↑ 2,0 2,1 2,2 2,3 2,4 2,5 2,6 2,7 Gill, E. Leonard; Winterbottom, J.M. (hersien) (1975). A first guide to South African birds (7de uitg.). Kaapstad: Maskew Miller. p. 127. ISBN 0623005964.
  3. ↑ Schoeman, P.J. (1983). Die Kleinvolk van Afrika (1ste uitg.). Johannesburg en Kaapstad: Perskor. pp. 97–99. ISBN 0-628-02461-4.
  4. ↑ "African Fish Eagle (Haliaeetus vocifer) - Birds.com: Online Birds Guide with Facts, Articles, Videos, and Photos". Birds.com. Besoek op 12 Desember 2012.
  5. ↑ "African Fish Eagle videos, photos and facts - Haliaeetus vocifer". ARKive. Geargiveer vanaf die oorspronklike op 27 Desember 2012. Besoek op 12 Desember 2012.

Bron

Eksterne skakels