سنوريات

سنوريات (Felidae) هي فاميلة ديال لبزوليات ف تنضيمة كارنيڤورات ، كايسميوهم ب شكل عامّي قطوط ولا مشاش. شي عضو من هاد لفاميلة كايعيّطو ليه عاوتاني سنور.

سنوريات
معلومات عامة
سمية لعيلمية	Felidae (يوهان غوتلف فيشر فون فالدهايم، 1817)
لخاصية د ترتاب	فاميلة
تابع ل	Feloidea و سنوريات الشكل
لعيشة
عايش فلفترة	25 ملاين دالسنين قبل لميلاد
خصايصو
صوت لي كايدير	خرخرة

ل41 نوع لي باقي من السنوريات كايورّيو التنواع لكبر ف نماط لفرو وسط ݣاع اللحايميات. لقطوط عندهم مخالب كايتطواو، كسدات رقاق و عضليين و طراف قداميين فليكسيبل و مجهدين. سنانهم و عضلات وجههم كايخلّيوهم تكون عندهم عضة مجهدة. هوما كاملين بيهم لحايميين ملزومين، و جلهم كايكونو مفتارسين خلويين لي كايغفلو ولا كايتبعو فرايسهم. لقطوط لبريين موجودين ف إفريقيا، أوروپا، آسيا، و أمريكا الجنوبية و الشمالية. شي نواع من لقطوط لبريين مآضاپطيين معا لموايل لغابويين و الصاڤانا، و شي بيئات ݣاحلين، و شي شوية منهم عاوتاني تآضاپطاو معا لعيشة ف لاراضي لفازݣين و التيرات الجبليين. النماط د نشاطهم كايتفاوتو من النمط الليلي و لغسقي ل النمط النهاري، هادشي كايعوّل على نواع لفرايس لي كايخيّروهم.

ريدجنلد إينيس پوكوك قسّم السنوريات لباقيين ل تلاتة د لفاميلات تحتانيين: النمريات، لمشيّات و لفهديات، و فرّزهم على بعضياتهم ب سباب التعضام (ossification) ديال السيسطيم اللامي و ب سباب لمغامد الجلديين لي كايحميو مخالبهم. هاد لكونصيپط تعاود تراجع فيه من بعد الديڤلوپمو ف لبيولوجيا لموليكية و الطيكنيكات لمخدّمين ف تحليل الضونيات لمورفولوجيين. دابايا، السنوريات لعايشين مقسمين ل جوج فاميلات تحتانيين: النمريات و لمشيّات، أما لفهديات تدخّلو ف لفاميلة التحتانية اللخرة. النمريات كايجمعو خمسة د النواع من ݣنس پانطيرا و جوج من ݣنس نيوفيليس (مشيات جداد)، ف لوقيتة لي لمشيّات كايشملو ال34 نوع لي باقي ف 12 لݣنس.

لقطوط اللولانيين برزو ف وقيت عصر لأوليݣوصين هادي 25 مليون عام، معا الضهور د پروآيلوروس و پسوديلوروس. لعقدة د النوع اللخر كانت سلفية ل جوج خطوط ساسيين د السنوريات: لقطوط لي ف لفاميلات التحتانيين لباقيين و واحد لݣروپ منقارض د سنوريات "سنان السيف" ف لفاميلة التحتانية سيفيات السنان (Machairodontinae)، لي تفاوتو من النوع لݣنسي سيفي السنان (Machairodus) د اللخر د لميوصين ل السميلوضون ديال عصر لپلايسطوصين. "سيفيات السنان لمزورين"، سنوريات لباربورو و النيمراڤيدات، ماشي قطوط د بصح بلحق قراب ليهم. هوما و السنوريات، الزباديات، زباديات النخل ليفريقيين، لفلنوكيات، الضبعيات، و النمسيات. كاملين بيهم كايشكلو سنوريات الشكل.

ݣاع لاعضاء ديال فاميلة لقطوط عندهم لخصايل الجايين ب شكل مشروك:

• هوما كفيين لمشية (digitigrade) و عندهم خمسة د الصبعان ف رجليهم لقداميين و ربعة ف رجليهم اللورانيين. مخالبهم لمقوسين كايكونو كايتجبّدو و لاصقين ف لغضم اللخر د الصبع هوما و الليݣاموات و الطونضوات. لمخالب مكاليين عليهم واحد لمغامد جلديين، هادشي عند لݣنوس كاملين من غير لفهديات.
• التبطانات لكفيين لي ف الرجلين لقداميين و اللورانيين كايشكلو وسادات تلاتيين لفصوص مدكسين.
• هوما كايجبّدو مخالبهم ب شكل آكتيڤ ب تكماش لعضلات ف الصبع، و كايطويوهم ب شكل پاسيڤ. مخالب الندى (dewclaws) كايوساعو و لكن ماكايتجبّدوش.
• هوما عندهم كسدات رشيقين و فليكسيبل ب طراف معضلين.
• جماجمهم مقصرين (foreshortened) ب واحد لپروفيل ضاير و تقواسات كبار.
• عندهم 30 سنّة ب تشكال سنّي د 3.1.3.13.1.2.1. الضرسة لقبلية لفوقانية التالتة و الضرسة التحتانية مآضاپطيين ب صيفتهم سنان لحايميين، لايقين ف تشراݣ و تقطاع اللحم. النياب كايكونو عندهم كبار، و كايوصلو ل قد موعتابار ف سيفيات السنان لمنقارضين. السنان اللحايميين التحتانيين كايكونو صغر من لفوقانيين و فيهم واحد التاج ب جوج قمقومات مضغطين و مقمقمين بحال الزيزوار.
• لساناتهم مغطيين ب حليّمات (papillae) بحال لݣرون لي كايكشّطو اللحم من لفريسة و كايعاونو ف لمداعبة (Grooming).
• نيوفهم بارزين ب شويش من مور لفك التحتاني.
• عينيهم كايكونو نسبياً كبار، محطوطين باش يمدّو الشوف الجاوجي (binocular vision). الشوف ديالهم ف الليل كايكون مزيان ب لأخص ب سباب لحضور ديال واحد الطاپيّة شفافة (tapetum lucidum)، لي كاتعكس الضو ف لداخل د كورة لعين، و كاتعطي ل عينين السنوريات واحد الشعا مفرّز. لحاصول د هادشي، عينين السنوريات كايكونو ستة د لمرّات حساسين ل الضو كتر من لي عند بنادم، و شلّا نواع كايكونو ليليين ب شكل جزئي علاقل. الشبكية د السنوريات فيها عاوتاني واحد لكمية زايدة ب شكل نسبي ديال لخلايا لعصويين (rod cells)، لي مآضاپطيين على ود تفراز لأوبجيات لمحرّكين ف الضوروف د الضو خافت، لي كايكمالو ب لحضور د لخلايا لمخروطيين (cone cells) على قبل لحسّان ب اللون فوقيت النهار.
• عندهم سبولات (whiskers) مديڤلوپيين مزيان و حساسين ب زايد فوق لعينين، ف لحناك، و لقنوقة، بلحق ماكاينينش تحت من لݣادومة. السبولات كايعاونو ف التحراك وسط الضلام و ف قبيط و شدّان لفرايس.
• ودنيهم لبرّاويين كايكونو كبار و ب لاخص حساسين ل الصوات ب تردود طالع عند نواع لقطوط لي صغر. هاد لحساسية كاتخلّيهم يقلّعو بلاصة لفرايس الصغار من القوارض.
• لقضيب عندهم شبه مخروطي، كايتقابل معا لتحت منين ماكايكونش قايم، و كايتقابل معا اللور ف وقيت لبول. لباكولوم (عضمة لقضيب) كايكون صغير ولا آتاري (vestigial)، و قصر على لي عند لكلبيات. لاغلابية د السنوريات عندهم شوك قضيبي (penile spines) لي كايحفّز ليباضة ف وقيت لتيصال الجنسي.
• عندهم واحد لعضو ميكعي نيفي (vomeronasal) ف اللها د فمهم، لي كايخلّيهم "يدوقو" لهوا. التخدام د هاد لعضو مرافق ب الستيجابة د فليمن (flehmen response).
• ماكايقدروش يديطيكطيو لحلاوة د السكار، حيت كاينقصهم الرسيپطور الدوقي د لحلاوة.
• كايشركو واحد التستيفة مشابهة ب شكل عريض من التشكالات الصوتيين و لايني ب شي تنواعات بينات النواع. ب الضبط، النبرة د التعييطات كاتنوّع، معا النواع لكبار كايخرّجو صوات غارقين؛ ب شكل عام، التردود د لعيطات كايتفاوت بينات 50 و 10,000 هيرتز. الصوات لمعياريين لي كايتطلقو من السنوريات كايجمعو لموّا (mewing)، التݣراع (chuffing)، التنخام (spitting)، التهسهيس (hissing)، التزمجير (snarling) و التݣرݣير (growling). لموّا و التݣراع هوما الصوات د لكونطاكط الساسيين، أما الصوات لخرين كايعنيو شي تحفاز عدواني.
• كايمكن ليهم يخرخرو (purr) ف الجوج حالات ديال التنفوس، وخا لقطوط النمريين كايبانو بلي كايخرخرو غير ف وقيت الدورة لوداقية و لتيصال الجنسي، و منين كايكونو الصغار كايرضعو. التخرخير ب شكل عام واحد الصوت ب نبرة هابطة ديال 16.8–27.5 هز (Hz) و مخلط ب نواع خرين د التشكالات الصوتيين ف وقيت الزفير. لقدرة على الزئير (roar) كاتجي من واحد لحنݣورة (larynx) مطوّلة و مآضاپطية ب شكل خاص و واحد السيسطيم لامي (hyoid apparatus). منين لهوا كايدوز من لحنݣورة و هو جاي من الريّة، حيوط لغضروف د لحنݣورة كايبداو يڤيبريو، هادشي لي كايخرّج الصوت. غير السبوعا، النمورا، لببور، و الجاݣوارات لي بوحدهم قادرين بصح يزئرو، وخا لموّاوات لمجهدين ݣاع د نمور التلج عندهم واحد الصوت كايتشابه، وخا مامهيكلش بحالهم. النمور لمطلسين مايمكن ليهم لا يخرخرو لا يزئرو، و عليها ݣنس نيوفيليس كايقولو بلي هو ݣروپ خت ديال ݣنس پانطيرا. لقطوط سنان السيف واقيلا كانت عندهم لقدرة على باش يزئرو و يخرخرو.

اللون، الطول، و لعمورية د فروهم كايكون منوع بزاف. لون لفرو كايغطي لݣاموت (السنسلة اللونية–Gamut) من لبيْض ل لكحل، و نماط لفرو من طاشات مفرّزين صغار، و خطوط ل جلخات صغار و نويورات (rosettes). جل نواع لقطوط كايتولدو ب فرو منقط، من غير الجاݣواروندي (Herpailurus yagouaroundi)، لقط الدهبي لآسياوي (Catopuma temminckii) و لكاراكال (Caracal caracal). لفرو لمنقط د صغار السبع (Panthera leo)، لفهد (Acinonyx jubatus) و لپوما (Puma concolor) كايتبدل ل فرو موحّد ف وقيت التطوور الجنيني ديالهم. هادوك لي كايعيشو ف بيئات باردين عندهم فرو غليض ب زغب طويل، بحال نمر التلج (Panthera uncia) و قط لمانول (Otocolobus manul). هادوك لي كايعيشو ف الزونات لمناخيين الستيوائيين و السخان كايكون عندهم فرو قصير. بزاف د النواع كايورّيو لميلانيّة (melanism) ب فراد كاملين ب لكحل، لپومات معروفين ب نقصان ف لميلانيزم و لكن لبيوضية (leucism) و لالبينيّة (albinism) كايكونو حاضرين ف لپومات هوما و شلّا سنوريات خرين.

ف لغالبية لعضمى من نواع لقطوط، الزنطيط كايشكل التلت ولا النص ديال طولة لكسدة، وخا كاينين شي ستيتناءات، بحال نواع اللانكس و لمارݣاي (Leopardus wiedii). نواع لقطوط كايتنوعو ب شكل كبير ف قدود لكسدة و الجمجومة، و التقل:

• أكبر نوع ف لقطوط هو لببر (Panthera tigris)، ب طولة د لكسدة و الراس كاتوصل حتى ل 390 سم، و تقل كايتفاوت من 65 ل 325 كݣ علاقل، و طولة د الجمجومة كاتفاوت من 316 ل 413 مم. وخا الطولة لماكسيموم د جمجومة السبع كبر ب شوية ب 419 مم، هوما ب شكل عام صغر ف طولة لكسدة و الراس على لببور.
• نواع لقطوط الصغر ݣاع هوما لقط مصدّي النقاطي (Prionailurus rubiginosus) و لقط كحل الرجلين (Felis nigripes). اللول عبارو 35–48 سم ف الطول و 0.9–1.6 كݣ ف التقل. اللخر عندو طول ماكسيموم د الراس و لكسدة ديال 36.7–43 سم، و تقل ماكسيموم مشجل ديال 2.45 كݣ.

لأغلابية ف نواع لقطوط عندهم واحد لعدد د لهاپلوويدات ديال 18 ولا 19. لقطوط د أمريكا لوسطانية و الجنوبية عندهم واحد لعدد د لهاپلوويدات ديال 18، واقيلا هادشي سبابو التخليطة ديال جوج كروموزومات صغر ل وحدين كبر.

السنوريات عندهم لياف عضليين من نوع IIx مجهدين ب تلاتة د لمرّات على اللياف لعضليين لي عند الرياضيين لبنادميين.

لفاميلة سنوريات طرف ف التنيضيمة سنوريات الشكل لي تقسّمات هادي 50.6 حتى ل 35 مليون عام تقريباً ل بزاف د لفاميلات. السنوريات و اللينسانݣات لآسياويين (Asiatic linsangs) كايتعتابرو ݣروپ خت، لي تفرْقات جوايه 35.2 حتى ل 31.9 مليون عام هادي.

لقطوط اللولانيين ف لغالب بانو هادي 35 حتى ل 28.5 مليون عام تقريباً. پروآيلوروس (Proailurus) هو أقدم قط معروف بان من بعد واقعة نقيراض ف عصور لإيوصين و لأوليݣوصين جوايه 33.9 مليون عام هادي؛ الشياطا د لفوصيل د هاد النوعحفرو عليهم ف فرانسا و ف التشكال الجيولوجي هسانضا ݣول (Hsanda Gol Formation) ف مونݣوليا. لوجود د لفوصيل كايلمّح بلي السنوريات وصلو ل امريكا الشمالية هادي 18.5 مليون عام تقريباً. هادشي شي 20 مليون عام من مور لوصول د الدبيات و النيمراڤيدات، و شي 10 مليون عام من بعد لكلبيات.

ف اللول د لميوصين جوايه 20 حتى ل 16.6 مليون عام هادي، سودايلوروس (Pseudaelurus) عاش ف إفريقيا. لفوصيل د فكاكو تحفر عليهم ف التشكالات الجيولوجيين د لپيريوض لڤاليسية (Vallesian) ف أوروپا، لوسط د لميوصين ف آسيا و اللخر د لعصر لهيمينفوردي (Hemingfordian) ل اللخر د لعصر لبارسطوڤي (Barstovian).

ف اللول ولا لوسط د لميوصين، سيفيات السنان (Machairodontinae) تطوورو ف إفريقيا و رحلو ل الشمال ف اللخر د لميوصين. و نيابهم لفوقانيين كانو كبار، و كانو مآضاپطيين على فريس لحيوانات لعشاشبيين لعملاقين لي كسداتهم كبار. سيفي السنان لميوصيني (Miomachairodus) هو أقدم عضو معروف ف هاد لفاميلة التحتانية. ميطايلوروس (Metailurus) عاش ف إفريقيا و أوراسيا جوايه 8 حتى ل 6 مليون عام هادي. شلّا جماجم د پاراماتشيرودوس (Paramachaerodus) تصابو ف صبانيا. هوموثيريوم (Homotherium) بان ف إفريقيا، أوراسيا و امريكا الشمالية 3.5 مليون عام تقريباً، و ميݣانطيرون (Megantereon) شي 3 مليون عام هادي. سميلوضون عاش ف أمريكا الجنوبية و الشمالية جوايه 2.5 مليون عام هادي. هاد لفاميلة التحتانية ولات منقارضة ف اللخر د لپلايسطوصين.

لحاصول ديال تحاليل ميطوكوندريين كايلمّح بلي نواع لقطوط لي باقي عايشين جاو من واحد الجد مشروك، لي تأصل ف آسيا ف اللخر د عصر لميوصين. هاجرو ل إفريقيا، أوروپا، و أمريكا الشمالية و الجنوبية على طول عشرة ديال لموجات د لهجرة علاقل ف هاد ل~11 مليون عام لفايتة. نيڤوات لبحر النازلين و لپيريوضات لمجمدين (glacial) و لمابين مجمدين (interglacial) سهّلو هاد لهجرات. پانطيرا بليثياي (Panthera blytheae) هو أقدم ݣنس نمري (pantherine) معروف، متورخ من اللخر د لحقبة لميسينية (Messinian) حتى ل لبدية د لحقبة الزانكلينية (Zanclean) جوايه 5.95 حتى ل 4.1 مليون عام هادي. واحد الجمجومة فوصيلية تحفر عليها ف 2010 ف بلدية زانضا ف السهب التيبيطي. پانطيرا پاليوسينينسيس (Panthera palaeosinensis) من شمال الشينوا ف لغالب متورخ من اللخر د لميوصين ولا اللول د لپليوصين. الجمجومة ديال هاد لهولوتيپ كاتشابه معا ديك د شي سبع ولا نمر. پانطيرا زدانسكيي (Panthera zdanskyi) متورخ ل لحقبة الجيلاسية جوايه 2.55 حتى ل 2.16 مليون عام هادي. بزاف د الجماجم لفوصيليين و عضام لفك تحفر عليهم ف شمال غرب الشينوا. پانطيرا ݣومباجوزينسيس (Panthera gombaszoegensis) هو أول قط نمري معروف لي عاش ف أوروپا جوايه 1.95 حتى ل 1.77 مليون عام هادي.

السنوريات لعايشين كايتحطو ف تمنية د النسولا تطوريين ولا تقسيمات د النواع. الجينوتيپاج (Genotyping) ديال لآديئين الناواوي ديال ل41 نوع سنوري كاملين بيهم طرا على طول التطوور وسط لغالبية د النسولا ب تمنية

لموضيلينݣ ديال تحوول نماط كبوط السنوريات ورّق بلي تقريباً ݣاع النماط تطوورو من نقاطي صغار.

ب شكل تقليدي، خمسة د لفاميلات التحتانيين مفرّزين وسط السنوريات، هادشي مبازي على لخصايل لفينوتيپيين: النمريات (Pantherinae)، لمشيّات (Felinae)، لفهديات (Acinonychinae)، و سيفيات السنان (Machairodontinae) و لپروأيلورينات لمنقارضين. لفهديات كان فيها غير ݣنس لفهد (Acinonyx) و لايني هاد لݣنس دابا ولى وسط لفاميلة التحتانية مشيّات.

فاميلة السنوريات فيها جوج فاميلات تحتانيين، 14 لݣنس، و 42 نوع علاقل. ليستة ديال النواع لباقيين على حساب سيسطيم لمعلومات الطاكسونوميين لمكمولين (ITIS):

فاميلة تحتانية مشيّات/قطيّات (Felinae) فيشر دي ڤالدهايم 1817:

• ݣنس فهد (Acinonyx) بروكس، 1828:
  • فهد (Acinonyx jubatus) شريبر، 1775
• ݣنس كاراكال (Caracal)شريبر، 1776:
  • قط دهبي إفريقي (Caracal aurata)طيمينك، 1827
  • كاراكال (Caracal caracal)شريبر، 1776
• ݣنس قط لپوما (Catopuma)سيڤيرتسوڤ، 1858:
  • قط لمون (Catopuma badia)ݣراي، 1874
  • قط دهبي آسياوي (Catopuma temminckii)ڤيݣورس و هولسفيلد، 1827
• ݣنس مش/قط (Felis)لينيوس، 1758:
  • قط لادغال (Felis chaus)شريبر، 1777
  • قط الرملة (Felis margarita)لوكي، 1858
  • قط كحل الرجلين (Felis nigripes)بورتشل، 1824
  • قط برّي (Felis silvestris) <شريبر، 1777
    • قط جبلي شينوي (Felis silvestris bieti)مايلن-إدواردس، 1892
    • قط برّي إفريقي جنوبي (Felis silvestris cafra )ديماريست، 1822
    • قط (Felis silvestris catus)لينيوس، 1758
    • قط برّي إفريقي (Felis silvestris lybica)فورستر، 1780
    • قط برّي آسياوي (Felis silvestris ornata)ݣراي، 1830
    • قط برّي أوروپي (Felis silvestris silvestris)شريبر، 1775
• ݣنس قط نمري (Leopardus)ݣراي، 1842:
  • كولوكولو (Leopardus colocolo)مولينا، 1782
  • قط لپامپاس (Leopardus pajeros)ديماريست، 1816
  • قط دجيفري (Leopardus geoffroyi)ضوغبينيي و جيغڤي، 1844)
  • كوضكوض (Leopardus guigna)مولينا، 1782
  • قط ببري جنوبي (Leopardus guttulus)هينسيل، 1872
  • قط لأنديز الجبلي (Leopardus jacobitus)كورناليا، 1865
  • أوصيلوط (Leopardus pardalis)لينيوس، 1758
  • قط ببري شمالي (Leopardus tigrinus)شريبر، 1775
  • مارݣاي (Leopardus wiedii)شينتس، 1821
• ݣنس سيرڤال (Leptailurus)سيڤيرتسوڤ، 1858:
  • سيرڤال (Leptailurus serval)شريبر، 1776
• ݣنس لانكس (Lynx)كير، 1792:
  • لانكس كاناضي (Lynx canadensis)كير، 1792
  • لانكس أوراسي (Lynx lynx)لينيوس، 1758
  • لانكس إيبيري (Lynx pardinus)طيمينك، 1827
  • لانكس صهب (Lynx rufus)شريبر، 1777
• ݣنس مانول (Otocolobus)براندت، 1842:
  • قط پالاس/مانول (Otocolobus manul)پالاس، 1776
• ݣنس سنور نمري (Pardofelis)سيڤيرتسوڤ، 1858:
  • قط رخامي (Pardofelis marmorata)مارتين، 1837
• ݣنس قط آسياوي (Prionailurus)سيڤيرتسوڤ، 1858:
  • قط نمري (Prionailurus bengalensis)كير، 1792
  • قط إيريوموط (Prionailurus iriomotensis)إيمايزومي، 1967
  • قط فطح الراس (Prionailurus planiceps)ڤيݣورس و هولسفيلد، 1827
  • قط مصدي النقاط (Prionailurus rubiginosus)جيفغي سان إيليغ، 1831
  • قط حوات (Prionailurus viverrinus)جيفغي سان إيليغ، 1831
• ݣنس پوما (Puma)جاردين،1834:
  • پوما (Puma concolor)لينيوس، 1771
  • جاݣواروندي (Puma yagouaroundi)جيفغي سان إيليغ، 1803

فاميلة تحتانية نمريات (Pantherinae)پوكوك، 1917:

• ݣنس قطوط جداد/نيوفيليس (Neofelis)ݣراي، 1867:
  • نمر بورنيو لمطلس (Neofelis diard)كوِڤييه، 1823
  • نمر مطلس (Neofelis nebulosa)ݣريفيث، 1821
• ݣنس نمر/پانطيرا (Panthera)أوكين، 1816:
  • سبع (Panthera leo)لينيوس، 1758
  • جاݣوار (Panthera onca)لينيوس، 1758
  • نمر (Panthera pardus)لينيوس، 1758
  • ببر (Panthera tigris)لينيوس، 1758
  • نمر التلج (Panthera uncia)شريبر، 1775

لعلاقات لفيلوجينيين ديال السنوريات لعايشين كايبانو ف لكلاضوݣرام لماجي.