Constelación

Ficha d'oxetu celesteConstelación
Parte de Esfera celeste
Cambiar los datos en Wikidata

Una constelación ye una zona de la esfera celeste na que un grupu d'estrelles visibles formen un patrón estacionariu reconocible, que aveza a representar un animal, un ser mitolóxicu o un oxetu inanimáu[1].

Ye posible que les primeres constelaciones foran definíes yá na Prehistoria. La xente quiciás les usara pa cuntar hestorias sobre les sos creyencies y esperiencies, sobre la creación del mundu y mitolóxiques. Diferentes cultures ya países inventaron les sos propies constelaciones; la memoria de dalgunes duró hasta entamos del sieglu XX, hasta que les constelaciones que conocemos anguaño foron reconocíes internacionalmente. Sicasí, el so reconocimientu cambió enforma a lo llargo del tiempu. Delles camudaron de tamañu o de forma, otres foron perpopulares nún momentu pa cayer dempués nel escaezu y otres más conociéronse namái nuna única cultura o nación. Dar-yos nome, amás, ayudó a astrónomos y navegantes a identificar les estrelles más fácilmente[2].

Doce (o trece) de les constelaciones de los antiguos pertenecen al zodiacu: asítiense a la rebalguina de la eclíptica, que ye trevesada pol Sol, la Lluna y les estrelles. Los oríxenes del zodiacu son históricamente inciertos: les sos divisiones astrolóxiques quedaron afitaes alredor del 400 e.C., na astronomía caldea o babilonia[3]. Les constelaciones entren na cultura occidental a traviés de l'Antigua Grecia, y son mencionaes nes obres de Hesíodo, Eudoxo y Aratu. Toloméu, un astrónomu grecorromanu nacíu n'Alexandría, incluyó na so obra Almagestu 48 constelaciones, les 12 del zodíacu y otres 36 (anguaño, tres de la división d'Argo Navis en trés constelaciones, son 38). La formación de les constelaciones foi tratada en bayura d'obres mitolóxiques; rescampla ente elles la Les metamorfosis del poeta llatinu Ovidiu. Les constelaciones más meridionales del Hemisferiu Sur foron siendo añedíes ente' sieglu XV hasta la metá del sieglu XVIII, a medida que los esploradores europeos foron navegando esos mares. Esta tresmisión de la cultura romana, al traviés de la europea, ye la responsable de qu'anguaño les constelaciones tengan nomes en llatín.

En 1922, la Xunión Astronómica Internacional aceptó formalmente la llista moderna de constelaciones, qu'inclúi 88, y en 1928 estableció les sos llendes oficiales. El conxuntu de les 88 cubre la esfera celeste completa[4][5], polo que cualisquier puntu de les coordenaes celestes ta dientro d'una d'elles. Dellos sistemes de nomenclatura estelar inclúin, cuando s'alcuentra un oxetu celeste nuevu, el nome de la constelación na que s'atopa pa describir la so llocalización aprosimada nel cielu. Na nomenclatura de Flamsteed, por exemplu, una estrella nómbrase por un númberu siguíu de la forma en casu xenitivu del nome de la constelación na que s'atopa.

Dellos grupos d'estrelles o grupos, nomaos asterismos, nun son, acordies cola definición formal, constelaciones; sicasí, son usaos davezu polos observadores pa guiase na so navegación pel cielu nocturnu. Los asterismos pueden ser delles estrelles d'una constelación, o combinar estrelles de varies de les constelaciones oficialmente reconocíes. Dellos exemplos son la tetera que se ve dientro la constelación de Saxitariu, o el xarré que forma'l Sietestrellu o Osa Mayor[6][7].

Ver tamién

Referencies

  1. ↑ «Definition of constellation». Oxford English Dictionary.
  2. ↑ «Constellation | Definition, Origin, History, & Facts | Britannica» (5 March 2024).
  3. ↑ «Studies in Babylonian lunar theory: part III. The introduction of the uniform zodiac». Archive for History of Exact Sciences 64 (6):  páxs. 617–63. 2010. doi:10.1007/S00407-010-0064-Z. «[T]he zodiac was introduced between −408 and −397 and probably within a very few years of −400.». 
  4. ↑ Delporte, Eugène (1930). International Astronomical Union: Délimitation scientifique des constellations.
  5. ↑ Ridpath, Ian (2018). «Star Tales: The final 88».
  6. ↑ «DOCdb Deep Sky Observer's Companion – the online database».
  7. ↑ «A Complete List of Asterisms».

Enllaces esternos