Gipuzkoa plaza

Gipuzkoa plaza
Donostia, Erdialdea
Gipuzkoa plaza, atzealdean Gipuzkoako Foru Aldundiaren eraikina ikus daitekelarik.
Herrialdea Lurraldea	Euskal Herria  Gipuzkoa
Gipuzkoa plaza Gipuzkoa plaza Gipuzkoa plaza
Koordenatuak:	43°19′16.23″N 01°58′56.06″W / 43.3211750°N 1.9822389°W / 43.3211750; -1.9822389

Gipuzkoa plaza Donostiako Erdialdean dagoen plaza edo enparantza da. Bertan Gipuzkoako Foru Aldundiaren eraikina kokatzen da. Lorategia Pierre Ducasse lorezainak diseinatu zuen.

Plazak gaur egungo izena du 1866ko irailaz geroztik, bertan eraiki baitzen Gipuzkoako Foru Aldundiaren jauregia eta Donostia hiriburu dela omentzeko.

Oinplano laukizuzenekoa da eta bertan amaitzen dira lehen zabalguneko zortzi kale nagusiak: Elkano, Peñaflorida, Andia, Txurruka, Idiakez, Kamino, Bengoetxea eta Legazpi.

Plaza arkupez inguratua dago eta etxebizitzen fatxadak (Foru jauregiarenak ez beste) diseinu bakarrekoak dira.

Pierre Ducasse lehunztarrak udal lorezain gisa egin zuen 1877an lorategi erromantikoaren proiektua, Jose Goikoa arkitektoarekin batera. Plaza oraindik hutsik zegoen: Bigarren Karlistaldian adibidez tropak biltzeko erabili zen. Pierrek lorategia diseinatu zuen eta hamar zuhaitz-espezie exotiko zituen zerrenda bat aurkeztu zuen: paulownia, kakiondoa, Virginiako tulipondoa, lizar urrekara, amerikar intxaurrondoa, ailantoa, likidanbarra, katalpa eta 3500 zuhaixka^[1].

Lorategiak 5.400 m² ditu eta zenbait oroigarri eta eraikuntza berezi dauzka^[2]:

• Jose Maria Usanditzagari eskainitako monumentua (Josep Llimona eskultoreak egina)
• Pierre Ducasseren omenezko plaka (inaugurazioaren mendeurrenean jarria)
• kiosko edo zutabe meteorologikoa
• ordu mahaia
• urmaela eta urjauzia (arrokaiarekin)
• zurezko zubitxoa

2014ko apirilaren 26an Gipuzkoako Foru Aldundiak Ikurrinaren omenaldia egin eta plaza honetan masta batean jarri zuen, aurretik Espainiako Gobernuak Gipuzkoako Foru Aldundian Espainiako bandera ipintzea inposatu baitzion.

• 
  Ikuspegia
• 
  Arkupeak
• 
  Parkea eta urmaela
• 
  Gipuzkoa plazako ikurrina

	Donostiako parkeak
Aieteko parkea • Alderdi Eder • Ametzagainako parkea • Arabako parkea • Arbizketa parkea • Arkazieta parkea • Basoerdi parkea Bidebietako parkea • Boulevardeko parkea • Castelao parkea • Erregina Erregenetearen parkea • Errotaburuko parkea • Etzieta parkea Eustasio Amilibia parkea • Frantziako pasealekua • Kristina Eneako parkea • Gipuzkoa plazako parkea • Harriako parkea • Koldo Mitxelena parkea • Larratxoko parkea • Luis Villasante parkea • Melodi parkea • Miramar Jauregiaren parkea • Miramoneko parkea Okendo plazako parkea • Ondarretako lorategiak • Orio parkea • Oroitzapenaren lorategia • Otxokiko parkea • Pagola-Damazelai parkea • Puioko parkea • Salvador Allende parkea • Santa Katalinako parkea • Serafin Baroja parkea • Siustegi parkea • Uliako Mintegietako parkea • Uliako parkea Urgullgo parkea • Zaragoza plazako parkea • Zilegi parkea • Zubimusuko parkea