Ամասիա Հայկազունի (ծննդյան թվականն անհայտ - մ.թ.ա. 1908, Արմավիր), Հայոց նահապետ արքա մ.թ.ա. 1940 - մ.թ.ա. 1908 թվականներին, Արամայիս Հայկազունու որդին, Արամանյակ Հայկազունու թոռը, Հայկ նահապետի ծոռը, Շարա Հայկազունու և Երաստ Հայկազունու եղբայրը, Հայկազունիների արքայական տոհմից։ Ամասիա Հայկազունի ուներ երեք որդի՝ Գեղամ Հայկազունի, Փառոխ Հայկազունի և Ցոլակ Հայկազունի։
Ամասիան ժառանգում է հորից արգավանդ դաշտավայրը և Արմավիր քաղաքը։ Ունենալով իր երեք որդիներին, նա անցնում է Երասխ գետը և հարավային լեռան ստորոտին կառուցում երկու բնակավայր՝ Փառիխոտ և Ցոլակերտ, որտեղ բնակեցնում է իր երկու փոքր որդիներին` Փառոխին ու Ցոլակին։ Բարձր հարավային լեռը նրա անունով կոչվում է Մասիս։ Կյանքի մնացած տարիները անցկացնում է Արմավիրում։ Ամասիային հաջորդում է ավագ որդին՝ Գեղամ Հայկազունին։
Աղբյուրներ
«Հայոց անձնանունների բառարան», Հրաչեայ Աճառեան, Երեւան, 1942, Հատոր 1, Ցուցակ 1, Էջ 115
«Հայոց Պատմություն», Մովսես Խորենացի, 1961, Երևան, Գլուխ Ա. ե, ժբ
«Պատմութիւն», Սեբեոս Բագրատունի, Ա. էջ 3, 5
«Պատմութիւն Հայոց», Ուխտանես, Ա. է, ժզ
«Պատմութիւն Աղուանից», Մովսես Կաղանկատվացի, 1860, Փարիզ, հրատ.՝ Կարապետ Շահնազարյան, Հատոր Ա. ժե (Արմայիսա)
«Պատմութիւն», Վարդան Արևելցի, է
«Հաւաքմունք ի գրոց պատմագրաց յաղագս գիւտի ժամանակաց անցելոց մինչեւ ի ներկայս», Սամուել Անեցի, Գ