Մայքլ Արթին
Մայքլ Արթին (անգլ.՝ Michael Artin, հունիսի 28, 1934[1], Համբուրգ, Նացիստական Գերմանիա[1]), ամերիկահայ մաթեմատիկոս և Մասաչուսեթսի տեխնոլոգիական ինստիտուտի անվանի պրոֆեսոր, որը հայտնի է հանրահաշվական երկրաչափության մեջ իր ներդրմամբ[10]։
Կենսագրություն
Արթինը ծնվել է Գերմանիայի Համբուրգ քաղաքում։ Նրա մայրը՝ Նատալյա Նաումովնա Յասնայան (հետագայում անունը փոխել է՝ դարձնելով Նատաշա և առավել հայտնի է դարձել այդ անունով՝ 1909-2003), ծնվել է փաստաբանի, հետագայում՝ հայտնի տնտեսագետ Նաում Յասնու (անգլ.՝ Naum Jasny, 1883-1967) ընտանիքում, Սանկտ Պետերբուրգում և 1921 թվականին, բոլշևիկների իշխանության գալուց հետո, արտագաղթել է Գերմանիա[11][12]։
Համբուրգում Նատաշան հաճախել է գիմնազիա, այնուհետև դասընթացներ Համբուրգի համալսարանում, որոնք անցկացրել է հանրահաշվի 20-րդ դարի մեծագույն մասնագետներից մեկը՝ հայազգի Էմիլ Արթինը։ Արթինն ու Յասնայան ամուսնացել են 1929 թվականին, Մայքլ Արթինը նրանց երկրորդ որդին է։ 1937 թվականին Էմիլ Արթինը հեռացվել է համալսարանից (Նատաշան կիսով չափ հրեա էր), և նրանց ընտանիքն արտագաղթել է Ամերիկայի Միացյալ Նահանգներ[13]։
1955 թվականին Մայքլ Արթինը Փրինսթոնի համալսարանից ստացել է բակալավրի աստիճան։ Դրանից հետո նա տեղափոխվել է Հարվարդ և 1960 թվականին ստացել է փիլիսոփայության դոկտորի կոչում Օսկար Զարիսկու ղեկավարությամբ (թեզի թեման՝ On Enriques' Surfaces)[14]։ Նա չի հրապարակել թեզը, քանի որ կարծում էր, որ այն բավականաչափ լավը չէ տպագրության համար[11]։ Մինչև 1963 թվականը Արթինն աշխատել է Հարվարդի համալսարանում, այնուհետև որոշ ժամանակ անցկացրել է Ֆրանսիայում, Բարձրագույն գիտական ուսումնասիրությունների ինստիտուտում (IHES)՝ մանակցելով Միշել Դեմազյուրի Séminaire de Géométrie Algébrique du Bois Marie (SGA) գրքի 4-րդ հատորի ստեղծմանը։ 1966 թվականին ստացել է Մասաչուսեթսի տեխնոլոգիական ինստիտուտի պրոֆեսորի պաշտոնը։ Սխեմաների կատեգորիայում ներկայացվող ֆունկտորները նկարագրելու խնդրի վերաբերյալ նրա աշխատանքը հանգեցրել է Արթինի մոտարկելի թեորեմի ապացուցմանը։ Նա նաև տվել է հանրահաշվական տարածության սահմանումը, որն ընդհանրացնում է սխեմայի սահմանումը և թույլ է տալիս հանրահաշվական երկրաչափության մեթոդները տարածել մոդուլների շատ տարածությունների վրա։ 1974 թվականին նա տվել է հանրահաշվական ստեկի նոր սահմանում։ 1980-ական թվականներից նրա հետազոտական հետաքրքրությունները տեղափոխվել են ոչ կոմուտատիվ երկրաչափության ոլորտ[13]։
Պարգևներ և մրցանակներ
- 1999՝ Չեռնի հրավիրյալ պրոֆեսոր
- 2002՝ Լերոյ Պ. Սթիլի մրցանակ ողջ կարիերայի ընթացքում ակնառու նվաճումների համար
- 2005՝ Հարվարդի համալսարանի բարձրագույն դպրոցի հարյուրամյակի մեդալ
- 2013՝ Վոլֆի մրցանակ
- 2013՝ ԱՄՆ-ի ազգային գիտական մեդալ
Վաստակ
Մայքլ Արթինը ԱՄՆ-ի Գիտությունների ազգային ակադեմիայի, Արվեստի և գիտությունների ամերիկյան ակադեմիայի (1969)[15], Ամերիկյան գիտության զարգացմանն օժանդակող միության[10] անդամ է, Մոսկվայի մաթեմատիկական ընկերության պատվավոր անդամ[10]։ Նա նաև Ամերիկյան մաթեմատիկական ընկերության իսկական անդամ է[16], 1991-1992 թվականներին եղել է նրա նախագահը։
Ծանոթագրություններ
- ↑ 1,0 1,1 1,2 1,3 1,4 1,5 1,6 Michael Artin — MacTutor History of Mathematics archive.
- ↑ 2,0 2,1 2,2 2,3 Czech National Authority Database
- ↑ https://www.siam.org/prizes-recognition/fellows-program/all-siam-fellows
- ↑ 4,0 4,1 http://www.ams.org/fellows_by_year.cgi?year=2013
- ↑ 5,0 5,1 http://www.ams.org/news?news_id=1680
- ↑ Bibliothèque nationale de France data.bnf.fr (ֆր.): տվյալների բաց շտեմարան — 2011.
- ↑ Mathematics Genealogy Project — 1997.
- ↑ 8,00 8,01 8,02 8,03 8,04 8,05 8,06 8,07 8,08 8,09 8,10 8,11 8,12 8,13 8,14 8,15 8,16 8,17 8,18 8,19 8,20 8,21 8,22 8,23 8,24 8,25 8,26 8,27 8,28 Mathematics Genealogy Project — 1997.
- ↑ https://www.siam.org/prizes-recognition/fellows-program/all-siam-fellows?page=1
- ↑ 10,0 10,1 10,2 «Faculty profile» (անգլերեն)։ MIT mathematics department։ Արխիվացված է օրիգինալից 2013-04-08-ին։ Վերցված է 2013-08-03
- ↑ 11,0 11,1 «Artin Michael»։ MacTutor History of Mathematics archive (անգլերեն)։ University of St Andrews։ Վերցված է 2013-08-03
- ↑ Karin Tate։ «Natascha Artin-Brunswick, née Jasny — Biography» (անգլերեն)։ Արխիվացված է օրիգինալից 2016-03-04-ին։ Վերցված է 2013-08-03
- ↑ 13,0 13,1 «2002 Steele Prizes» (անգլերեն)։ American Mathematical Society։ Վերցված է 2013-08-03
- ↑ «Michael Artin» (անգլերեն)։ Mathematics Genealogy Project։ Վերցված է 2013-08-03
- ↑ «BookofMembers» (անգլերեն)։ American Academy of Arts & Sciences։ Վերցված է 2013-08-03
- ↑ «List of Fellows of the American Mathematical Society» (անգլերեն)։ Վերցված է 2013-08-03