Intelligensa artifiçiale

ZE
 Sta pagina a l'é scrita in zeneise, segondo a grafia unitäia

L'intelligensa artifiçiale (AI), inta seu definiçion ciù larga, a denòtta l'intelligensa demostrâ da-e machine, mascime da-i scistemi informatichi. Comme discipriña de reçerca drento de l'informatica, a se conçentra in sciâ progettaçion e o studio d'algoritmi e de software che permettan a-e machine de perçepî quello che gh'an d'in gio, d'imprende da-i dæti e d'applicâ l'intelligensa pe compî de açioin che aumentan e seu poscibilitæ de razzonze de finalitæ speçifiche.[1] I scistemi che mostran ste capaçitæ en pe-o sòlito diti IA.

Di exempi d'applicaçioin de l'IA comprendan i motô de reçerca pe-o web (comme Google Search); e ciattaforme de recommendaçion (addeuviæ da di servixi comme YouTube, Amazon e Netflix); i ascistenti virtuali (pe exempio, Google Assistant, Siri ò Alexa); de machine à guidda autònoma (comme Waymo); di instrumenti generativi e creativi (comme ChatGPT ò Llama); e di scistemi d'IA che scompassan e prestaçioin umañe inti zeughi strategichi (compreiso i scacchi e go). L'é un caxo coioso comme de spesso, quande unna tecnologia à l'avanguardia basâ in sce l'IA a se spantega e a vëgne assæ commun, a no l'é ciù ni consciderâ ni etichettâ comme IA.[2]

A reçerca in sce l'IA a comprende tanti sottocampi dedicæ à de finalitæ e de tecniche speçifiche. E finalitæ tradiçionale comprendan o raxonamento, a representaçion da conoscensa, a progettaçion, l'imprendimento, l'elaboraçion do lenguaggio naturale, a perçeçion e o sostëgno a-a robòtica. Pe arrivâ à sti propòxiti, i reçercatoî incòrporan e adattan diversci metodi, comme l'imprendimento automatico, a lògica formale, e ræ neurale artifiçiale e a reçerca operativa. L'IA a se basa ascì in scê intuiçioin che vëgnan da-a neurosciensa, da-a linguistica, da-a filosofia e da ben ben d'atri settoî.[1]

Stæta sabilia comme discipriña academica do 1956, a reçerca inte l'IA a l'à visciuo diverse fase d'ottimiximo, ciascheduña apreuvo à di periodi de finançiamento reduto e de deluxon conosciui comme «inverni de l'IA».[3][1] O sviluppo de tecniche d'imprendimento profondo pe-e ræ neurale artifiçiale do 2012 o l'à aumentou assæ i finançiamenti e l'attençion pe st'äia de reçerca, con accelerâ ancon de ciù dòppo l'invençion de l'architettua do trasformatô do 2017.[4] À partî da-i anni 20 de sto millennio, di miliardi de dòllai en stæti incanaæ inta reçerca oe l'IA, co-o resultato de un progresso ancon ciù spedio ch'o l'é stæto definio o «boom de l'IA». A nascion de tecniche d'IA generativa durante sto boom a l'à misson in evidensa e conseguense inatteise de ste tecnologie e a l'à descadenou de discuscioin in scî potençiali reiseghi de l'IA. De conseguensa, gh'é delongo ciù tante domande pe-a regolamentaçion e a garançia de un sviluppo seguo e benefico de l'IA.

Nòtte

  1. ↑ 1,0 1,1 1,2 (EN) Stuart Russell, Peter Norvig, Artificial Intelligence: A Modern Approach, Prentice Hall, 2003, ISBN 978-0-13-790395-5.
  2. ↑ AI set to exceed human brain power, in sce cnn.com (archiviòu da l'url òriginâle o 19 frevâ 2008).
  3. ↑ (EN) James Lighthill, Artificial Intelligence: A General Survey, in Artificial Intelligence: A paper symposium, 1973.
  4. ↑ (EN) Rob Toews, Transformers Revolutionized AI. What Will Replace Them?, in Forbes, 2023 (archiviòu da l'url òriginâle l'8 dexénbre 2023).

Atri progetti