Ochin de mâ

Ochìn de mâ, scrito ascì öchin de mâ, numme cumün atribuiu a-i oxélli d'a famiggia d'i Laridæ.

Descriçion

Sun di oxelli mæn (o cumunque d'ægua) de meddie e grosse dimensciuin, cu-u beccu forte e tortu in çimma, i ae lunghe e apinçüe, drüe, a cua cürta e quæa, e çampe cürte, drüe, parmæ; u diu pusteriû svilüppou. E ciümme po-u ciü gianche cu-u mantu e i ae ciü scüe e u capüççu neigru o scüu inta livrea estiva; i zueni gh'han u mantu amaciou.

Difüxi lungu e coste de tütti i cuntinenti (ecettu l'ochin giancu ch'u se ne stà de lungu a l'amâ). Sun in gennere di migratuî parçiæ (migra i zueni o quelli ch'en ciü a nord). Fan u niu pe tæra e solan furmâ de culonnie.

Gh'han 'na dieta opurtünistega ch'a pö cumprende pesci, crustaçei, mulüschi, vermi, insetti, carogne, öve e picin di atre specce d'oxelli, de votte adürti ascì. L'oumentu strameziou de rümenta dispunibbile inte descarreghe u l'ha favuiu un nuteive incrementu du nümeru di individdui de specce onivue.

En di animæ inteligenti, cuiuxi, asperti, che exibiscian di cumpurtamenti cumplesci, prez. e culonnie se difendan insemme da-i predatuî, dövian de furme evulüe de cumünicaçiun e çerte specie en scin-a bun-e a döviâ u beccu cumme ütenscile.

E specce d'ochin che se pö incuntrâ in Ligurria^{[1] [2]}

• Oca ciapæa (Larus argentatus, L. michaellis, L. cachinnans)
• Oca de mâ (Larus marinus, Larus hyperboreus)
• Ochin grossu de spalle neigre (Larus fuscus)
• Ochin de mâ mezan (Larus canus)
• Ochin fratin o capüçin (Chroicocephalus ridibundus)
• Ochin giancu (Rissa tridactyla)
• Ochin testa neigra (Ichthyaetus melanocephalus)
• Ochinettu (Hydrocoloeus minutus)

Galeria

• 
  Ochin grossu de spalle neigre
• 
  Ochin de mâ mezan
• 
  Ochin fratin
• 
  Ochin testa neigra

File murtimediæ

Notte

1. ↑ [1] Girolamo Calvi, Catalogo d'ornitologia di Genova, Genova, F.lli Pagano, 1828]
2. ↑ [2] AA.VV., Descrizione di Genova e del genovesato, Volume 1, Ferrando, Genova, 1846.

Atri progetti

• Wikimedia Commons a contêgne di files in sce Ochin de mâ
• Wikispecies a contêgne informaçioìn in sce Ochin de mâ