Ивер

Ивер
Позиција на иверот (бутна коска), означено во црвените делови.
Десен ивер, предна страна.
Податоци
Назнаки
Латински	Os femoris, os longissimum
MeSH	A02.835.232.500.247
TA	A02.5.04.001
FMA	FMA:9611
[уреди на Википодатоците]

Иверот (латински: femur) е парна и најдолга коска во човековото тело, позната како бутна коска.

На иверот се разликуваат:

• тело (латински: corpus femoris) наликува на тристрана призма, лаковидно извиена во конвекситет нанапред, служи за припојување на одделни мускули на бутот;
• глава (латински: caput femoris) се спојува со зглобната површина од ацетабулумот на карличната коска;
• анатомски врат (латински: collum femoris);
• голема џумка (латински: trochanter major);
• мала џумка (латински: trochanter minor);
• два кондила (латински: condylus medialis et lateralis) однапред се споени, а одназад се раздвоени со интеркондиларна јама, долните површини од кондилите се зглобуваат со тибијата, а однапред се зглобуваат со чашката (латински: patella), бочно од кондилите се наоѓа по еден незглобен епикондил.

Мускулите во овој дел го поврзуваат горниот крај од иверот со коските од карличниот појас и го поврзуваат иверот со горните краеви од коските на потколеницата:

• слабинскобедрен мускул (латински: m.iliopsoas), составен од два мускули:
• бедрен мускул (латински: m.iliacus), тргнува од илијачната јама на карличната коска;
• голем слабински мускул (латински: m.psoas major) тргнува од телата и напречните израстоци на слабинските прешлени. Двата мускули со заедничка тетива завршуваат на малата џумка од иверот;
• голем седален мускул (латински: m.gluteus maximus) тргнува од крилото на бедрената коска и од крсната коска, а завршува на задната страна од бутот;
• среден седален мускул (латински: m.gluteus medius) се наоѓа под големиот седален мускул и има ист припој како големиот седален мускул;
• најмал седален мускул (латински: m.gluteus minimus) сместен е најдлабоко, а има ист припој како големиот и средниот седален мускул;
• четириглав мускул на бутот (латински: m. quadriceps) составен е од четири глави, едната глава тргнува од карличната коска, а другите три од иверот. Сите глави преку заедничка тетива означена како пателарен лигамент завршуваат на горниот крај од тибијата, мускулот е силен екстензор на потколеницата;
• двоглав мускул на бутот (латински: m. biceps femoris) составен е од две глави кои тргнуваат од карличната коска и иверот, а завршуваат со заедничка тетива на главата од фибулата.

Зглобовите го поврзуваат скелетот на карлицата со бутот и меѓу себе коските од скелетот на слободниот дел од ногата:

• зглоб на колкот (латински: articulatio coxae) го поврзува ацетабулумот од карличната коска со главата од бутната коска. Спаѓа во топчести зглобови и во него се вршат сите движења на ногата;
• зглоб на коленото (латински: articulatio genus) ги спојува кондилите од иверот со кондилите од големата писка, напред е патела, а меѓу зглобните површини се вметнати латерален и медијален менискус, во зглобот се вршат движења на флексија, екстензија и делумна ротација.

• 
  Позиција на иверот (црвен дел).
• 
  Позиција на иверот во карлицата.
• 
  Облик на иверот.
• 
  Внатрешен и надворешен изглед на иверот.
• 
  Приказ на главата, вратот и двете џумки на иверот (предна страна).
• 
  Приказ на двата кондила на иверот.
• 
  Скршеница на вратот од иверот.
• 
  Задна страна на иверот.