آوریل ۲۰۱۵

۱

• محمدو بوهاری نیجریه‌ی ِرییس‎جمهور بیّه و مردِم خیابون‌ها دله شه خِشحالی ره سِراق هِدانه. بوهاری پونزَه و نیم میلیون رأی بیارده و ونه رقیب گودلاک جاناتان بی‌یه. گودلاک جاناتان قبلی رییس‌جمهور نوم هسته که اسا شه شکست ره قبول هاکرده و خانه رضایت جه قدرت ره منتقل هاکنه. (یورونیوز)
• مقرن بن عبدالعزیز، عربستون ِشاه، بائوته که یمن ِجنگ جه موافق نی‌یه. (العالم)

۲

• ایران ِهسته‌یی مذاکرات
  • ایران و 5+1 ِمذاکرات ِاتا مرحله تموم بیّه و مشترک ِبیانیه ره بخوندستنه. این بیانیه گانه ایران ِهسته‌یی تأسیسات چتی ونه عَوِض بَوون و تحریم‌ها ره چتی گیرنه. (یورونیوز و العالم)
  • باراک اوباما: «هیچ زمون نی‌یلین بی‌ترس مذاکره هاکنیم؛ ولی هیچ گادر هم نی‌یلین ترس وسّه مذاکره نکانیم.» (یورونیوز)
• کنیا دله الشباب ِگروه، که القاعده په دره، اتا دانشگا دله بیش از هفتاد نفر ره بَکشاته. (پرس تی‌وی)

۶

• روسیه امنیت شورا جه بخاسته که یمن جنگ ره تموم هاکِنِن تا بی‌یلِن مردِم ره کومِک هاکِنِن و دِوا و غِذا بَرِسِنِن که قبول نَکاردنه. عربستون ِائتلاف نی‌یِنّه که یمنیون جه هچّی دِوا و امدادی کومِک بَرِسه و مُدام غیرنظامیون ِسِره‌ئون ره زَنده. دِ هفته دله این جنگ بیش از پانصد نفر بَمرده و 1700 زخمی داشته. (یورونیوز)

۱۱

• دِتا بازرسی ِمأمور جده دله دِتا ایرانی نوجوون که خاستنه حج جه وَردِگِردِن ره بِگانه. ایرانِ مجلس اتا ات‌فوریتی طرح هدائه که حج عمره ره لغو هاکنه. آیت‌الله مکارم شیرازی این مسئله خوری بائوته: «یعنن این عمره که واجب نی‌یه ره ونه هر بدبختی و خفت جه بوردِن؟» (وای‌جی‌سی و الف)
• امریکا و کوبای ِرییس‌جمهورون اولین بار وسّه هِدی ره دَست هِدانه. پانامای ِاجلاس دله باراک اوباما بائوته که دیگه آمریکا نِخانه جنوبی آمریکایی کشورون ِدله‌یی اوضاع سَره دخالت هاکنه و من‌بعد این کار امریکا وسه ونه مجازات داره. (یورونیوز)
• عربستون دَه روز په اجازه هِدائه که صلیب سرخ ِبالون‌ها بتونِن یمن دله فرود بِئِن. اولین بالون جه ۱۶ تن دِوا دَیّه. یمن جنگ سره این کشور ِاوضاع فاجعه‌آور بیی‌یه. عربستون و ونه متحدون پالایشگائون و نفتی مراکز ره زنّه و بیش از ۶۴۰ نفر ره تا اسا بَکاشتنه. (یورونیوز)

۱۲

• نیکلاس مادورو و باراک اوباما هِدی جه پاناما دله ملاقات هاکردنه و آمریکای رییس‌جمهور بائوته که نِخانه ونزوئلای ِدِشمِن بائه. مادورو هم بائوته که اوباما وسّه احترام قائله ولی ونجه اعتماد ندانّه. (پرس تی‌وی)
• یمن ِاتا قبیله که عربستون ِسامون پَلی دَرنه، این کشور ره حمله هاکِردنه و انتقام وسّه ده‌ها عربستونی ره بَکاشتنه. (پرس تی‌وی)

۱۳

• آزاد ِکشتی ِجهونی جام دله ایران بتونسته آمریکا ره فینال دله بَوِره و قهرمون بَواشه. این مسابقات آمریکا دله بی‌یه. (پرس تی‌وی)
• پاکستون ِپارلمون رسماً رای‌گیری جه اعلام هاکرده که این کشور یمن جنگ دله ونه بی‌طرف بائه. این بی‌طرفی ره امارات ِسیاستمدارون متناقض و خطرناک اعلام هاکردنه که پاکستون دله وه ره اتا تهدید و غیردیپلماتیک عمل شرح هِدانه. (پرس تی‌وی)
• گونتر گراس، آلمانی نویسنده، بمرده. (انگلیسی ویکی‌پدیا)

۱۴

• روسیه پنج-شیش سال ِپه، بلأخره اس-300 ِموشکون، که ایران جه بَروت بی‌یه، ره تحویل هِدا. (پرس تی‌وی)
• سودان دله اتا انتخاب بی‌یشتنه که عمر البشیر ونه دله دِباره شرکِت هاکرده و احتمالاً برنده وانه چون مخالفون انتخابات ره تحریم هاکردنه. (پرس تی‌وی)
• عربستون ِشاه و ترکیه‌ی رییس جمهور هِدی ره قطر ِمیونجی‌کَری جه بَدینه و گپ بَزونه که چتی سوریه دله دخالت هاکِنِن. (پرس تی‌وی)
• هیلاری کلینتون رسماً اعلام هاکرده که خانه ریاست جمهوری ِانتخابات دله نومزه بَوو. وه یحتمل دموکراتون ِکاندیدا وانه. (یورونیوز)
• برونئی ِدومین شاهزاده اتا مجلل ِمراسم دله ازدواج هاکرده. (العالم)

۲۰

• تورین دله اتا تیکه کفن ره که گانّه مسیح ِوسّه بی‌یه ره عمومی هارشی‌ین وسّه بی‌یشتنه. (یورونیوز)
• شمالی قبرس دله اتا رفراندوم ریاست جمهوری سَره انجام بَیته که دومین دور سَر بَکشی‌یه بیّه. (یورونیوز)

۲۱

• استرالیای ِخارجی امور ِوزیر بموئه ایران و شه سَر چارقد بی‌یشته که باعث بیّه ونجه شه کشور دله انتقاد هاکِنِن که چه نَوِسته «غربی ارزشون» جه دفاع هاکنه؟ (یورونیوز)
• اتا کشتی که لیبی جه قاچاقی دَرشی‌یه ایتالیا، مدیترانه دریا دله غرق بیّه و ۸۰۰ نفر این کشتی جه بمردنه. این آدمون ویشته اتیوپی و اریتره‌ی ِکشورون جه بینه و خاستنه ایتالیا دله اتی بتتر زندگی هاکنِن. (یورونیوز)

۲۵

• ارمنستون دله صدمین سالی که ارمنون ره عثمانی ِدولِت قتل‌عام هاکرده ره مراسم بَییتنه و فرانسوا اولاند و ویلیادمیر پوتین هم مراسم دله گپ بَزونه. (یورونیوز)

۲۶

• نپال دله دیروز اتا زلزله بموئه که بیش از هفت ریشتر بی‌یه و حدود دِ هزار نفر ره بَکاشته. نزدیک هشتاد سال بی‌یه که اینتی زلزله این کشور دله نمو بی‌یه. (MSN)

۲۸

• شمالی قبرس ِریاست‌جمهوری ِانتخابات دله اتا میونی-چپِکی حزب ِکاندیدا که خانه قبرس دله اتحاد بِسازه، برنده بیّه. این آدِم ِنوم مصطفی آکینجی هسته. (یورونیوز)
• نپال ِزلزله‌ی ِبمرده‌ئون چارهزار نفر جه ور بورده و هند، چین و پاکستون و چن وقت بعد آمریکا، جاپون، اسرائیل و ترکیه دَرنه زلزله‌بدی‌یه‌ئون ره کومِک کانّه. مردمون ِاوضاع روستائون و شهرون دله خله بد هسته و اتخله آدم دَرنه تَلِف وانّه. (یورونیوز)