Cheurque
Ch't' articl'ye fut c'menchie en Jèrriais
|
Un cheurque (
cheurque, rétchîn, Guernésiais : hau, Serkyee : chörk) est un paîsson auve eune stchelette cartilaginneuse et 5-7 dginnes des bords d'la tête.
Y'a eune grande vâriêté d'cheurques (dans les 360 manniéthes) - la mâjorité sont des mangeurs d'viande, mais les pus grands sont des mangeurs d'pliancton qu'i' craînchent dé d'dans l'ieau. Lé pus p'tit cheurque a 25cm dé long et l'pus grand, lé Cheurque-Baleine (Rhincodon typus), craît jusqu'à 15m dé long - ch'est l'pus grand des paîssons d'achteu.
Les gens ont peux des cheurques, mais raique 4 manniéthes dé cheurque sont r'connus coumme des mangeurs d'gens. L'pus êpeûthant est l'Grand Blianc Cheurque (Carcharodon carcharias), mais ch'est probabl'ye qué dans la mâjorité des cas les cheurques ont mêprîns des nageurs pouor des loups-mathîns. Acouo eune tchînzaine dé manniéthes dé cheurque ont attatchi des gens, mais ch'est pus probabliément eune tchestchion dé d'fense.
Y'a des cheurques tchi ponnent d's oeux - nou trouve lus chiviéthes du dgiâbl'ye parfais sus la grève. D'aut's cheurques donnent naîssance à des p'tits cheurques.
Dé couoteunme, les cheurques démeuthent dans la mé ou dans l'ochéan, mais y'a des manniéthes dé cheurques tchi peuvent vivre dans dé l'ieau fraîche, dans des riviéthes ou des mathes.
Manniéthes dé cheurque
- Prionace glauca - Jèrriais : bliu cheurque, Guernésiais : charque
- Carcharodon carcharias - grand blianc cheurque
- Alopias vulpinus - r'nard, r'naûd
- Lamna nasus - rétchîn
- Sphyrna spp - cheurque-marté
- Rhincodon typus - cheurque-baleine
