Le doi frassion ëd Bërgnàu e Frascà as treuvo an riva al torent Cròu, ant la region dij Còj Tortonèis ch'a fan part dël pre-Apenin lìgur-piemontèis.
Stòria
Ël castelËl teritòri ocupà dal comun ëd Bërgnàu e Frascà a l'è stàit abità fin dal Neolìtich, 'me a testimonio ij tant artrovament archeològich conservà ant ël local musé dë stòria, ancheuj sarà. A son stàit trovà 'dcò ij rest ëd vile roman-e e d'edifissi ruraj d'età imperial. Ant l'àuta Età 'd Mès a fasìa part dël contà 'd Torton-a col nòm ëd Balegnan. Andà an ruin-a ant ël cors dij sécoj, dël 1375 Galeass Viscont a conced Bërgnàu an feod a Spinëtta Spìnola, ch'a arcostruiss un castel sël leugh ëd n'antich fortilissi. Dël sécol ch'a fa XV, an séguit a na faida familiar ch'a l'ha portà al sassinament ëd vàire Spìnola, ël castel a passa a la famija Guidbòu Cavalchin. Dël 1685 ël castel a l'é vendù a la famija Ferrari 'd San Bastian e dël 1800 a passa a la famija genoèisa dij Bruzzo.
D'apress a l'época dla dominassion fransèisa ëd Napoleon Bon-a-part, Bërgnàu e Frascà a passo al Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e ant ël Mandament ëd San Bastian da Cròu. Dël 1928 ij comun autònom ëd Bërgnàu, Frascà e Mumpròn a ven-o unì ma dël 1947 ël comun ëd Mumpròn as dëstaca torna për sò cont.
Aministrassion
Ël sìndich a l'é Roberto Mandirola (da l'08/06/2009, scond mandà dal 26/05/2014).
