As treuva ant l'Apenin Lìgure, ant la Val dël Cròu, a la confluensa dij torent Cròu e Museja.
Stòria
La parochial ëd San BastianNa gesiëtta dedicà a san Bastian a l'é cità ant un document tanme cela dipendent da l'abassìa 'd San Colomban ëd Beubi. Ël pais as dësvlupa prinsipalment a parte dal Quatsent, giutà da la vzinansa a la Via dla Sal ch'a mnava da Génoa a Piasensa. La posission a favorìa ël nasse 'd servissi për ij comerciant: magasin, depòsit, ostarìe e piòle. San Bastian a dipendìa da Gremiasch e a fasìa part dël feod ëd Frògna. Dël 1349 ël teritòri dl'abità atual a l'era stàit anfeodà dal vësco-cont ëd Torton-a a la famija Malaspin-a, ch'a l'ha vendùla dël 1485 a la vajanta famija genoèisa dij Fiesch, an vnisend a fé part d'un gran Feod Imperial ant l'Apenin, valadì d'ën teritòri ch'a dependìa diretament da l'Imperi Roman Sacrà. Dël 1547 la famija dij Fiesch a faliss na congiura contra Andrea Doria për pié 'l podèj ant la Repùblica ëd Genoa e l'an ch'a ven dòp l'imperador Carl V d'Asborgh, ch'a sostenìa la Repùblica genoèisa, a passa a Andrea Doria tùit ij Feod Imperiaj dij Fiesch.
D'apress a l'época dla dominassion fransèisa ëd Napoleon Bon-a-part, ch'a sanciss la fin dij feod imperiaj, San Bastian a passa al Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e a cap d'ën Mandament comprendent Bërgnàu, Frògna, Frascà, Gremiasch e Montèigo.
Aministrassion
Ël sìndich a l'é Vincenzo Caprile (dal 26/05/2014, dagià sìndich dal 1985 al 2004).
