As treuva ant l'Apenin Lìgure, ant l'àuta Val dël Cròu e a l'é un-a dij pòch comun piemontèis, ansema a Cabela e a Cariegà, a confiné con l'Emilia-Romagna.
Stòria
La piev romànica ëd Santa MariaContut che la region anté ch'as treuva Frògna a sìa stàita abità fin da la Preistòria da tribù 'd bërgé Ligurin, ij prim ansediament a comenso ant ël sécol ch'a fa IX e a son dësvlupasse ant ij sécoj sucessiv an séguit a le migrassion ëd gent da le còste dla Liguria ch'a scapavo dai Sarasin. Dagià dël sécol ch'a fa IX a l'era present n'avampost dël monasté 'd San Colomban ëd Beubi. Formà d'antorn a la Piev ëd Santa Maria, ël pais a l'ha peui vist nasse n'Ospissi andova ch'i monio a dasìo ospitalità a pelegrin e mërcant. Col feodalesim, Frògna a l'ha avù sò castel e ël teritòri a l'é stàit assignà prima ai vësco-cont ëd Torton-a (1157), peui dël sécol ch'a fa XIII, a la famija dij Malaspin-a, ch'a l'ha tnilo ansema ai Dòria tanme Feod Imperial fin al 1797.
D'apress a l'época dla dominassion fransèisa ëd Napoleon Bon-a-part, ch'a sanciss la fin dij feod imperiaj, Frògna a passa al Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e ant ël Mandament ëd San Bastian da Cròu.
